«كۇلىكبايەۆ 2016 جىلدىڭ 17-18-شىلدەدە جانسۇگىروۆ كوشەسىندەگى ايات قوناق ۇيىندە جوزەكشەلەر ءجۇرۋى مۇمكىن ەكەنىن الدىن الا جوسپارلاپ، ءوزىنىڭ ءدىني الەۋمەتتىك كوزقاراسىنا قايشى بولعاندىقتان، جەزوكشەلىكپەن اينالىساتىن ايەلدەردى ءولتىرۋ ماقساتىندا اتالعان ورىنعا بارعان. قوناق ءۇي اۋلاسىندا تۇرعان يمانعالييەۆكە تيەسىلى كيا ريو اۆتوكولىگىنە بارىپ، ونىڭ ىشىندە جەزوكشەلەر بار ەكەنىن بولجاپ، ىشىندە وتىرعان يمانعالييەۆتەن تەرەزەسىن اشۋدى سۇراعان.

كولىك تەرەزەسى اشىلعاننان كەيىن، بىرنەشە ەسكەرتۋ جاساپ، وعان كونبەگەن سوڭ ارتقى ورىندىقتا وتىرعان سودنيكوۆانى باسىنان اتىپ ولتىرگەن. وسى كەزدە يمانعالييەۆ قاشىپ شىققان. كۇلىكبايەۆ ونىڭ ارتىنان وق اتقانىمەن، تيگىزە الماعان. ۋاقىتىن ءتيىمدى پايدالانۋ ماقساتىندا كولىككە كەلىپ، ىشىندە وتىرعان ەكىنشى ءومىرزاقوۆانى الىپ، سودينكوۆانىڭ ءمايتىن الىپ، قالادا جۇرگەن.

جولدا ءومىرزاقوۆاعا «سەندەر اللادان قورىقپايسىڭدار! اللادان كەشىرىم سۇرا؟! اللانىڭ جولىندا قارسى شىقساڭدار، ءبارىڭدى جارىپ جىبەرەمىن» دەپ قورقىتقان. ءومىرزاقوۆا ومىرىنە ءقاۋىپ تونگەندىكتەن كەشىرىم سۇراپ، ءوز ءاميانىن كۇلىكبايەۆقا بەرگەن.

كۇلىكبايەۆ ىشىندە 7 مىڭ تەڭگەسى بار ءومىرزاقوۆانىڭ اميانىمەن قوسا، كولىك ىشىندە تۇرعان يمانعالييەۆتىڭ  ىشىندە 42 000 تەڭگەسى بار ءاميانىن العان. جولدا كولىكتىڭ قىزىل باعدارشامعا توقتاعانىن پايدالانىپ، ءومىرزاقوۆا ودان قاشىپ شىعىپ قۇتىلعان. كۇلىكبايەۆ ونى قۋماعان. وسىدان كەيىن كۇلىكبايەۆ قالاداعى ءبىر دۇكەن الدىنا كەلىپ كولىكتى قالدىرىپ كەتكەن»، — دەدى پروكۋرور جارقىن باقاشبايەۆ.

قىلمىستىق ىستەر جونىندەگى مامانداندىرىلعان اۋدانارالىق سوتى سۋدياسى ەرلان بولاتوۆتىڭ ايىپتالۋشىلارعا ورنىنان تۇرىپ، جاۋاپ بەرۋ قاجەت دەگەن تالابىنا ايىپتالۋشى رۋسلان كۇلىكبايەۆ باعىنبادى، دەپ حابارلايدى سوت زالىنان قازاقپارات ءتىلشىسى.

«كۇلىكبايەۆ ورنىڭىزدان تۇرىڭىز!» دەگەن سۋديا ەرلان بولاتوۆتىڭ تالابىنا كۇلىكبايەۆ باعىنبادى. بىرنەشە رەت ايتىپ ورنىنان تۇرعىزا الماعان سۋديا اقىرى سەبەبىن سۇراۋعا ءماجبۇر بولدى.

كۇلىكبايەۆ ءىشىن كورسەتىپ: «تۇرسام، اۋىرادى!» دەپ جاۋاپ بەردى.

بۇعان سۋديا كەلىستى.

ايتا كەتەيىك، الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا رۋسلان كۇلىكبايەۆقا قاتىستى قىلمىستىق ءىستى اتالعان سوت سۋدياسى ەرلان بولاتوۆ جۇرگىزىپ جاتىر. كۇلىكبايەۆ بىرنەشە قانقۇيلى توناۋ جانە قاراقشىلىق ارەكەتتەرگە قاتىستى بولىپ وتىر. بۇعان دەيىن حابارلانعانداي، تەرگەۋ توبى 57 سوت ساراپتاماسى مەن زەرتتەۋلەر جۇرگىزدى جانە بولعان وقيعانىڭ بارلىق جايتتەرىن انىقتاۋ ماقساتىندا 200-دەن استام كۋاگەرلەر مەن وقيعانى كورگەن ادامداردى تەرگەدى.

2016 جىلدىڭ 12-قازانىندا 61 تومنان تۇراتىن قىلمىستىق ءىس سوتقا جولداندى. رۋسلان كۇلىكبايەۆقا 8 قۇقىق قورعاۋ جانە ارنايى ورگان قىزمەتكەرلەرىن جانە 2 بەيبىت تۇرعىندى ءولتىردى، تەررورلىق اكت جاسادى دەگەن ايىپ تاعىلدى. سونىمەن قاتار، ول 3 بەيىبىت تۇرعىندى ولتىرمەك بولدى دەپ ايىپتالىپ وتىر.