الماتىدا كولىك سالىعى بويىنشا بەرەشەگى بار جۇرگىزۋشىلەرگە قاتىستى رەيدتىك شارالار باستالدى، دەپ حابارلايدى Dala News.
مەملەكەتتىك كىرىستەر دەپارتامەنتىنىڭ مالىمەتىنشە، شارالار قالا اكىمىنىڭ كولەڭكەلى ەكونوميكانى ازايتۋ جانە بيۋدجەت تۇسىمدەرىن ارتتىرۋ جوسپارى اياسىندا جۇرگىزىلۋدە. رەيدتەرگە پوليسيا دەپارتامەنتى مەن جەكە سوت ورىنداۋشىلار پالاتاسى دا قاتىسىپ جاتىر.
«بورىشكەر» جەدەل-پروفيلاكتيكالىق ءىس-شاراسى بارىسىندا قارىزى بار كولىكتەر «سەرگەك» كامەرالارى ارقىلى انىقتالادى. مۇنداي كولىكتەر بەرەشەك تولىق وتەلگەنگە دەيىن ايىپ تۇراعىنا قويىلادى.
قازىرگى تاڭدا الماتىدا كولىك سالىعى بويىنشا بەرەشەك 85 مىڭنان استام سالىق تولەۋشىگە تيەسىلى جانە جالپى سوماسى 7 ملرد تەڭگەدەن اسادى. ۆەدومستۆونىڭ مالىمەتىنشە، قارىزدىڭ باسىم بولىگى قوزعالتقىش كولەمى 4000 تەكشە سانتيمەتردەن اساتىن كولىكتەرگە تيەسىلى.
قۇزىرلى ورگان جۇرگىزۋشىلەردى قوسىمشا شىعىندار مەن ايىپ تۇراعىنا قويۋدىڭ الدىن الۋ ءۇشىن بەرەشەكتەرىن ۋاقىتىندا وتەۋگە شاقىردى. رەيدتىك جۇمىستار جالعاسۋدا.
