الماتى ۆولونتەرلەرى قالانىڭ الەۋمەتتىك مەكەمەلەرىنىڭ اۋماقتارىن تازارتۋعا كومەكتەسىپ، «جارقىن كۇز» ەكولوگيالىق اكسياسىنا بەلسەندى قاتىسادى. وسىلايشا، اتالعان ىس-شارالارمەن قارتتار ۇيلەرى، بالالار ۇيلەرى، ۇيسىزدەرگە ارنالعان باسپانالار جانە باسقا دا الەۋمەتتىك مەكەمەلەر قامتىلدى، – دەپ حابارلايدى Dalanews.kz الماتى قالاسى اكىمىنىڭ باسپا ءسوز قىزمەتىنە سىلتەمە جاساپ.
ۇيىمداستىرۋشى قالانىڭ جاستار ساياساتى باسقارماسىنىڭ قولداۋىمەن الماتى ۆولونتەرلەرىنىڭ ءفرونت-وفيسى بولدى.
جاستار قالانىڭ تازالىعىن ساقتاۋ اركىمنىڭ ورتاق مىندەتى ەكەنىن تۇسىنەدى. ولار كوپشىلىكپەن بىرگە جۇمىس ىستەپ، قالانى تازالاپ قانا قويماي، الماتىلىقتارعا قورشاعان ورتاعا قامقورلىق جاساۋدىڭ ماڭىزدىلىعىن ءتۇسىندىردى.
ولاردىڭ پايىمىنشا، مۇنداي باستاما اۋماقتاردى تازارتۋدان بولەك، قالا تۇرعىندارىنا وزدەرىنىڭ اۋماقتارىن تازا ۇستاۋدى جانە تازالىق شارالارىنا بەلسەنە قاتىسۋدى ۇندەيتىن ماڭىزدى شارا دەپ ۇعىناتىندارىن جەتكىزدى.
قارتتار ۇيلەرى مەن بالالار ۇيلەرىنىڭ جانىنداعى اۋماقتاردى تازارتۋ – بۇل تازالىقتى ارتتىرىپ قانا قويماي، وندا تۇراتىن ادامداردىڭ كوڭىل-كۇيىنە وڭ اسەر ەتەتىنى انىق.
– مەن ەرىكتى رەتىندە قالانىڭ الەۋمەتتىك مەكەمەلەرىنىڭ اۋماقتارىن تازالاۋعا قاتىستىم. ءبىز قوقىستاردى الىپ تاستادىق، قورشاۋلاردى بويادىق، جاسىل ايماقتاردى رەتكە كەلتىردىك جانە وسى مەكەمەلەردىڭ تۇرعىندارى ءۇشىن قولايلى جاعداي جاساۋعا تىرىستىق. مەنىڭ ويىمشا، مۇنداي اكسيالار قوعاممەن بايلانىستى نىعايتۋعا جانە ءبىزدىڭ قولداۋىمىزعا مۇقتاج ادامدارعا قامقورلىق جاساۋدىڭ ماڭىزدىلىعىن كورسەتۋگە كومەكتەسەدى، – دەپ اتاپ ءوتتى ەرىكتى قۇدايبەرگەن ءشامشى.
ەستەرىڭىزگە سالا كەتەيىك، الماتىدا «تازا قازاقستان» جالپى رەسپۋبليكالىق باعدارلاماسى جانە «الماتى – ءبىزدىڭ ورتاق ءۇيىمىز» قالالىق ناۋقانى اياسىندا جۇزەگە اسىرىلىپ جاتقان «جارقىن كۇز» اكسياسى جالعاسۋدا. بۇل ەكواكسيا اعىمداعى جىلدىڭ 24 قازانىنا دەيىن جالعاسادى.
