الماتى قالاسىندا 35 جوعارى وقۋ ورنىندا 199 مىڭنان استام ستۋدەنت ءبىلىم الادى، ونىڭ 124 مىڭى باسقا وڭىرلەردەن (62،3%) كەلگەن.
- ق ر پرەزيدەنتىنىڭ تاپسىرىسى بويىنشا الماتىدا جاتاقحانا ماسەلەسىن شەشۋ ماقساتىندا ۇلكەن جۇمىستار جاسالىپ جاتىر. وسى ماسەلەنى شەشۋ ءۇشىن الماتى قالاسىن دامىتۋدىڭ 2025 جىلعا دەيىنگى باعدارلاماسى اياسىندا 12 مىڭ ورىندىق، ال 2030 جىلعا دەيىن تاعى 20 مىڭ ورىندىق جاتاقحانا سالۋ جوسپارلانعان. ول دەگەنىمىز قالامىزداعى جاتاقحانا ماسەلەسى تولىق شەشىلەدى دەگەن ءسوز. 2023 جىلدىڭ سوڭىنا دەيىن 3 959 توسەك-ورىنعا ارنالعان 15 نىسان پايدالانۋعا بەرىلەدى.
ونىڭ 1 550 توسەك-ورىنعا ارنالعان 7 نىسان قايتا جوندەۋ جۇمىستارى ارقىلى قىركۇيەك ايىندا ىسكە قوسىلدى. وسىلايشا بيىلعى جىلدىڭ جوسپارلى كورسەتكىشى 2 ەسەگە جۋىق ارتىعىمەن ورىندالىپ، جاتاقحانا تاپشىلىعى 28،7 مىڭ توسەك-ورىنعا دەيىن قىسقاردى، – دەدى الماتى قالاسى جاستار ساياساتى باسقارماسىنىڭ باسشىسى قايىرجان مەندىعالييەۆ.
ايتا كەتەيىك، جۇمىستى ءتيىمدى ۇيلەستىرۋ ءۇشىن الماتى قالاسىندا جوبالىق كەڭسە ىسكە قوسىلعان بولاتىن. ول قالامىزداعى جاتاقحانا ماسەلەسىن جۇيەلى تۇردە شەشۋ ءۇشىن قۇرىلعان.
"ءبىزدىڭ جاتاقحانادا ەكى جاڭا عيمارات، سىيىمدىلىعى 980 توسەك-ورىن، جالپى اۋدانى 14.000 ش.م. استام جانە سپورت كەشەنى بار. 10 ايدىڭ ىشىندە ءبىز ۇلكەن جۇمىس جاسادىق. ءبىز الماتى قالاسىنداعى ستۋدەنتتەرگە ارنالعان تۇرعىن ءۇي قاجەتتىلىگىن تولىعىمەن جاباتىن العاشقى ۋنيۆەرسيتەتپىز"، - دەدى قازاقستان-بريتان تەحنيكالىق ۋنيۆەرسيتەتىنىڭ رەكتورى ماراتبەك گابدۋللين.
بۇگىنگى تاڭدا جوبالىق كەڭسەدە 42 452 توسەك-ورىنعا ارنالعان 48 جوبا بار. ونىڭ ىشىندە 33 نىسان 38740 توسەك-ورىنعا ارنالعان جاڭا جاتاقحانالار، 15 نىسان قايتا جوندەۋ جۇمىستارىنان ءوتىپ، 3712 توسەك-ورىنعا ارنالعان جاتاقحانا رەتىندە بەرىلەدى.
