ايدار ابىلدابەكوۆ اتاپ وتكەندەي، 2021 جىلعى ۇلتتىق ساناقتىڭ نەگىزگى كەزەڭى قازاقستاندا 1 قىركۇيەكتەن 30 قازانعا دەيىن وتۋدە. ادىستەمە بويىنشا 8 قاراشاعا دەيىن تاعى ءبىر رەت تەكسەرۋ، ارالاپ شىعۋ قاراستىرىلعان. ساناق ۇرانى: «قازاقستاندا ءاربىر ادام ماڭىزدى!».
– بۇگىندە ساناق بويىنشا حالىقتى كەڭىنەن قامتۋ الماتى قالاسىندا تىركەلگەن. ساناقتان وتكەن تۇرعىنداردى تىركەۋ بويىنشا ءبىزدىڭ قالا وڭىرلەر اراسىندا ءبىرىنشى ورىندا. 2 188 603 رەسپوندەنت سۇرالدى، بۇل 109،1%-دى قۇرايدى، – دەپ حابارلادى ايدار ابىلدابەكوۆ.
ق ر ۇلتتىق ستاتيستيكا بيۋروسى سايتىنىڭ دەرەگى بويىنشا اعىمداعى جىلدىڭ 1 تامىزى بويىنشا مەگاپوليستە 2 005 496 ادام تۇراقتى تۇرعان. ونلاين-ساناق پەن پىكىرتەرىمنىڭ ارالىق قورىتىندىسى بويىنشا ينتەرۆيۋەرلەر قازىرگى ۋاقىتتا الماتى حالقىنىڭ سانى ارتقانىن كورسەتتى.
– ساناق ەل حالقىنىڭ ناقتى سانىن، ونىڭ قۇرامى مەن ءومىر ءسۇرۋ جاعدايلارى تۋرالى اقپاراتتى بىلۋگە مۇمكىندىك بەرەدى. ولاردى تالداۋ ناتيجەلەرى بويىنشا «حالىقتىڭ ساپاسى» تۋرالى ايتۋعا بولادى. ساناقتىڭ نەگىزگى ءمانى – ءار ادام ەسكەرىلۋى كەرەك. ومىرلىك شەشىمدەر وسىعان بايلانىستى. مىسالى، جاڭا ەمحانالاردى، مەكتەپتەردى قايدا اشۋ كەرەك، كولىك ينفراقۇرىلىمى ماسەلەسى شەشىلەدى. دەموگرافيالىق ستاتيستيكانى كوممەرسيالىق كومپانيالار دا پايدالانادى، – دەدى سپيكەر.
ايدار ابىلدابەكوۆ 15 قازانداعى ونلاين-ساناق اياقتالعان ساتتەن باستاپ تۇرعىنداردان ونلاين-ساۋالناما فۋنكسياسىن جاڭارتۋ تۋرالى كوپتەگەن وتىنىشتەر تۇسە باستاعانىن اتاپ ءوتتى. وسىعان بايلانىستى سايتتا ونلاين-رەجيمدە 21 قازاننان باستاپ sanaq.gov.kz پلاتفورماسىنىڭ ساناق جۇرگىزۋ فۋنكسياسىن جاڭارتۋ تۋرالى شەشىم قابىلداندى. ساۋالنامانى بۇرىنعىداي مامانداندىرىلعان sanaq.gov.kz سايتىندا تولتىرۋعا بولادى. ول ە-Gov پورتالى جانە Aitu ءموبيلدى قوسىمشاسى ارقىلى اۆتوريزاسيالاندى. ونلاين ءوتۋ فۋنكسياسى حالىق ساناعىنىڭ سوڭىنا دەيىن قولجەتىمدى بولادى.
– قالا 327 نۇسقاۋشىلىق جانە 2 287 ەسەپتىك ۋچاسكەگە بولىنگەن. ءاربىر ەسەپ ۋچاسكەسى ءبىر ينتەرۆيۋەرگە بەكىتىلگەن. تۇرعىنداردى تەك ونلاين-ساناقپەن قامتۋ بويىنشا اۋەزوۆ اۋدانى كوش باستاپ تۇر – 41،79%. ال، بوستاندىق اۋدانىندا ونلاين-ساناقپەن قامتۋ دەڭگەيى وتە تومەن – 24،09%. ەكىنشى فورمات – وفلاين-ساناق بويىنشا ءوز اۋداندارىنىڭ 80%-دان استامىن قامتىعان ناۋرىزباي، جەتىسۋ، الاتاۋ، تۇركسىب اۋداندارى كوش باستاپ تۇر، – دەپ حابارلادى ايدار ابىلدابەكوۆ.
قالانىڭ بارلىق اۋداندارى قازىرگى حالىق سانىنان اسىپ ءتۇستى. سونىمەن بىرگە، سۇحبات الۋشىلار ءالى دە مەگاپوليس تۇرعىندارىن قايتا جازۋدى جالعاستىرۋدا.
ق ر ۇلتتىق ستاتيستيكا بيۋروسىنىڭ الماتى قالاسى بويىنشا دەپارتامەنتىنىڭ باسشىسى قالا تۇرعىندارىنا بەلسەندىلىك تانىتقاندارى ءۇشىن العىس ايتىپ، ساناقتان وتپەگەن ادامداردى ونجىلدىقتىڭ اسا ماڭىزدى ءىس-شاراسىنا قاتىسۋعا شاقىردى.
– ەگەر ۇيىڭىزگە ساناق جۇرگىزۋشى كەلە الماسا، وندا ءسىز ونلاين-فورماتتا ساناقتان وتە الاسىز نەمەسە «1446» Call-ورتالىعىنا قوڭىراۋ شالىپ، وزىڭىزگە ينتەرۆيۋەردى شاقىرا الاسىز. حالىق ساناعىناد ءار ادام قامتىلسا، ءساتتى دەپ سانالادى. بۇل ءبىزدىڭ ەلىمىزدىڭ بارلىق تۇرعىندارىن قامتىعانىمىزدى بىلدىرەدى، – دەدى ا. ابىلدابەكوۆ.
ايتا كەتەرلىگى، الىنعان اقپارات وڭدەلگەن سوڭ ۇزاق مەرزىمدى بيۋدجەتتىك جوسپارلاۋدىڭ نەگىزىنە اينالادى.ۇلتتىق حالىق ساناعىنا قاتىساتىن ءاربىر ازامات مەملەكەتتىڭ الەۋمەتتىك باعدارلامالارىن جوسپارلاۋعا جانە ازىرلەۋگە ەلەۋلى جانە زور ۇلەس قوساتىن بولادى.
