ءبىر عانا الماتىدا مىڭنان استام قۇرىلعىعا قاتىستى شاعىم تۇسىرىلگەن دەپ حابارلايدى Dalanews.kz aikyn.kz-كە سىلتەپ.
تارقاتىپ ايتار بولساق، الماتىلىق اتا-انالار تەگىن تاراتىلعان پلانشەتتەردىڭ ىستەمەيتىنىن ايتىپ، شاعىم قالدىرعان.
قالا اكىمدىگىندە قۇرىلعان ارنايى كوميسسيا ساراپتامانىڭ ءبىرىنشى كەزەڭىن قورىتىندىلادى. «وتكەن اپتادا كوپبالالى انالاردىڭ تاراپىنان كوپ شاعىم كەلدى. سوعان بايلانىستى ءبىز اتا-انالاردىڭ قولىنداعى پلانشەتتەردىڭ تەحنيكالىق تالاپقا ساي ەكەنىن انىقتاۋ ءۇشىن ارنايى تاۋەلسىز ساراپتاما تاعايىندادىق»، – دەدى قوعامدىق باقىلاۋ ۇيلەستىرۋشىسى سايدا تاۋەكەليەۆا.
قالادا جالپى قۇنى 1 ملرد 319 مىڭ تەڭگە بولاتىن 22 مىڭ پلانشەت تاراتىلعان. 1 پلانشەت قۇنى 60 مىڭ تەڭگە شاماسىندا ەكەن.
«1119 پلانشەت جارامسىز بوپ شىقتى. بۇل بۇيىمداردى جەتكىزۋشىگە قايتاردىق»، – دەدى قالالىق ءبىلىم باسقارماسى باسشىسىنىڭ ورىنباسارى ايدىن سايلاۋباي. ساراپشىلاردىڭ پىكىرىنشە، تەحنيكالىق اقاۋلار مەحانيكالىق اسەردەن بولۋى مۇمكىن.
«زاۋىتتان بولعان اقاۋ بولسا، جەتكىزۋشى اۋىستىرىپ بەرەدى. بۇل تەحنيكا بولعاندىقتان، بۇزىلۋى مۇمكىن. پلانشەت ويناۋعا ەمەس، ساباق وقۋعا بەرىلەتىنىن ەسكەرۋ كەرەك»، – دەدى مونيتورينگ توبىنىڭ وكىلى رافاەل گاسانوۆ. ونىڭ ايتۋىنشا، پلانشەتتەرگە 3 جىل كەپىلدىك بەرىلەدى.
الماتى وقۋشىلارىنىڭ 96 پايىزى قاشىقتان ءبىلىم الۋى ءۇشىن قاجەتتى قۇرالمەن قامتىلعان. ەگەر پلانشەت مەحانيكالىق اسەردەن ىستەن شىقسا، ونى اۋىستىرۋ زاڭ بويىنشا قاراستىرىلماق.
