جاڭا قاۋلىدا ءومىر ءسۇرۋدى قامتاماسىز ەتەتىن نىسانداردىڭ جۇمىس ەرەكشەلىكتەرىنە ايرىقشا نازار اۋدارىلعان.
ماسەلەن، قاۋلىعا سايكەس مەنشىك نىسانىنا قاراماستان مەديسينالىق ۇيىمدار، ونىڭ ىشىندە ستوماتولوگيالىق ۇيىمدار، ونەركاسىپتىك، وندىرىستىك كاسىپورىندار جانە تىنىس-تىرشىلىكتى قامتاماسىز ەتۋ وبەكتىلەرى (جىلۋ، ەنەرگيا، سۋمەن جابدىقتاۋ، تاماقتانۋ جانە ت. ب.)؛ كوكتەمگى ەگىس، اۋىل شارۋاشىلىعى، قۇرىلىس جانە جول جۇمىستارىن جۇرگىزۋگە بايلانىستى نىساندار قىزمەتىن ۋاقىتشا توقتاتا تۇرۋعا جاتپايدى.
ءدارىحانالار، ونىڭ ىشىندە ۆەتەرينارلىق جانە ازىق-تۇلىك دۇكەندەرىنىڭ جۇمىسى ادەتتەگى رەجيمدە جالعاسادى. سول سياقتى كولىك قۇرالدارىنىڭ قوسالقى بولشەكتەرىنىڭ، تۇقىمداردىڭ، كوشەتتەردىڭ، مينەرالدىق تىڭايتقىشتاردىڭ ساتىلۋى، قۇرىلىس ماتەريالدارىنىڭ كوتەرمە ساۋداسى تاۋارلاردى بوساتۋ تەك الدىن الا تاپسىرىس بويىنشا، دۇكەنگە تىكەلەي بارماي، تاپسىرىس بەرىلگەن تاۋارلاردى ساتىپ الۋشىلار كەلگەن كەزدە بەرە وتىرىپ، جۇرگىزىلەتىن بولادى.
سانيتارلىق-گيگيەنالىق تالاپتاردى كۇشەيتە وتىرىپ حالىقپەن جۇمىس ىستەۋدى رەسمي تاكسي قىزمەتى دە جالعاستىرا الادى. ول ءۇشىن كولىك ءتيىستى بەلگىلەرمەن (تاكسيگە ارنالعان دويبى) جابدىقتالۋى جانە جۇرگىزۋشىنىڭ جەكە باسى تۋرالى اقپاراتتى جولاۋشىعا كورنەكتى ورىندا (جۇرگىزۋشىنىڭ پاسپورتتىق دەرەكتەرى، كاسىپورىننىڭ دەرەكتەرى، تەلەفون ءنومىرى، اتاۋى، اۆتوماشينانىڭ ءنومىرى) ۇسىنۋى ءتيىس. بۇل رەتتە ءبىر وتباسى مۇشەلەرىن قوسپاعاندا، جەڭىل كولىكتەگى ادام سانى 3-تەن (جۇرگىزۋشىنى قوسا العاندا) اسپاۋى ءتيىس.
ەلدى مەكەن ىشىندەگى قوعامدىق كولىكتەر دە جۇمىسىن جالعاستىرادى. قالالىق جانە اۋداندىق اۆتوبۋستاردىڭ تولىمدىلىعى وتىرعىزۋ ورىندارىنىڭ 40% - نان اسپاۋى ءتيىس. دەزينفەكسيالاۋ جانە جۋۋ قۇرالدارىن قولدانا وتىرىپ ءاربىر رەيستەن كەيىن اۆتوبۋستاردى، قوعامدىق كولىك ايالدامالارىن وڭدەۋ (كۇنىنە كەمىندە ەكى رەت) قاجەت. قوعامدىق كولىكتە قورعانىش ماسكاسىز جۇرۋگە تىيىم سالىنادى.
ۋاقىتشا ساقتاۋ قويمالارى، ولاردىڭ جۇمىسىن قامتاماسىز ەتەتىن تۇلعالار مەن ۇيىمدارى، سانيتارلىق-دەزينفەكسيالىق شارالاردى كۇشەيتە وتىرىپ جانە كەلۋشىلەر اراسىنداعى قاشىقتىقتى كەمىندە 1 مەتر ساقتاي وتىرىپ، ادەتتەگى رەجيمدە جەكە ورنالاسقان پوشتا بايلانىسى وبەكتىلەرى جانە ەكىنشى دەڭگەيدەگى بانكتەر، ميكروقارجىلىق قىزمەتتى جۇزەگە اسىراتىن ۇيىمدار جۇمىس ىستەي الادى (جۇمىس ۋاقىتىن شەكتەۋ ساعات 09-00-دەن 14-00-گە دەيىن).
سول سياقتى اۆتوجانارماي قۇيۋ ستانسيالارى، جەكە ورنالاسقان تەحنيكالىق قىزمەت كورسەتۋ ستانسيالارى، سالتتىق قىزمەت كورسەتۋ نىساندارى ءوز قىزمەتىن اتقارا بەرەدى.
وسى ورايدا شەكتەۋ كەزەڭىندە جۇمىس ىستەيتىن اتالعان نىساندار سانيتارلىق جانە دەزينفەكسيالىق رەجيم تالاپتارىن قاتاڭ ساقتاۋى ءتيىس، سونىڭ ىشىندە كىرەبەرىستە قول جۋۋعا ارنالعان سانيتايزەرلەر ورناتۋ، بارلىق قىزمەتكەرلەرىن ءبىر رەتتىك ماسكا مەن ءبىر رەتتىك قولعاپپەن قامتاماسىز ەتۋ، ۇستەلدەردىڭ، سورەلەردىڭ، ورىندىقتاردىڭ، باسپالداقتاردىڭ، تۇتقالاردىڭ، ەسىكتەردىڭ بارلىق بەتتەرىن جانە ەدەندەردى دەزينفەكسيالىق قۇرالدارمەن قولدانۋ نۇسقاۋلىعىنا سايكەس كۇنىنە كەمىندە 3 رەت وڭدەۋگە مىندەتتەلگەن. سول سياقتى كەلۋشىلەردىڭ بەتپەردەسىز بولۋىنا جول بەرمەۋ، كەلۋشىلەردىڭ الەۋمەتتىك قاشىقتىعىن كەمىندە 2 مەتر ساقتاۋدى قامتاماسىز ەتۋگە ءتيىس.
سونىمەن بىرگە ونەركاسىپ ءوندىرىسى نىساندارىنىڭ سۋبەكتىلەرى جانە ءومىر ءسۇرۋدى قامتاماسىز ەتەتىن نىساندار ءاربىر رەيستەن كەيىن كۇندەلىكتى دەزينفەكسيالىق وڭدەۋ جۇرگىزىپ، قىزمەتكەرلەردى بولىنگەن اۆتوكولىكپەن جەتكىزۋدى ۇيىمداستىرۋى ءتيىس. ءاربىر اۋىسىم الدىندا وبەكتىنىنىڭ وتكىزۋ پۋنكتىندە دەنە قىزۋىن ولشەپ، باقىلاۋ جۋرنالىنا تىركەۋى قاجەت. ۆيرۋستىق ينفەكسياعا (جوتەل، تۇماۋراتۋ، ءدام سەزىمىنىڭ جوعالۋى، ەنتىگۋ، جوعارى تەمپەراتۋرا، ديارەيا) كۇدىكتى ادامدار انىقتالعان كەزدە 103 قىزمەتىن شاقىرۋى ءتيىس.
اتاپ وتسەك، بۇل قاۋلى 2020 جىلدىڭ 8 ءساۋىرى كۇنگى ساعات 08.00-دە كۇشىنە ەنەدى.
الماتى وبلىسى اكىمىنىڭ باسپا ءسوز قىزمەتى
