قاراساي اۋدانىندا پوليسيا قىزمەتكەرلەرى قاراساي اۋدانى كوكوزەك اۋىلىنىڭ تۇرعىندارىن الداعان الاياقتىق سحەمانى اشتى، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
تابيعي گازدى قوسۋعا كومەكتەسۋگە ۋادە بەرگەن ەر ادام ازاماتتاردىڭ سەنىمىنە كىرىپ اقشاسىن الاياقتىق جولمەن يەمدەنگەن.
اۋداندىق پوليسيانىڭ مالىمەتىنشە، قاسكۇنەم پىسىقتالعان سحەما بويىنشا ارەكەت جاساعان: اۋىل تۇرعىندارىن گازدى قوسۋ پروسەسىن جىلدامداتۋ مۇمكىندىگىنە سەندىرىپ جانە الدىن الا تولەمدى تالاپ ەتكەن. الدىن الا تولەم العاننان كەيىن ول ءىز-تۇزسىز جوعالىپ كەتەدى. اۋىل تۇرعىندارىنا الاياقپەن كەلتىرىلگەن شىعىننىڭ جالپى سومماسى شامامەن جارتى ميلليون تەڭگەنى قۇرادى.
– الاياقتىق فاكتىلەرى بويىنشا قىلمىستىق ىستەر تىركەلدى. تەرگەۋ بارىسىندا الاياقتىقتىڭ ءۇش ەپيزودى انىقتالدى، الايدا زارداپ شەككەندەر كوپ بولۋى مۇمكىن. ءبىز كۇدىكتىنىڭ باسقا قىلمىستارعا قاتىسى بار-جوعىن تەكسەرۋدى جالعاستىرامىز، – دەپ حابارلادى پوليسيا.
الاياقتاردىڭ قۋلىقتارىنا ءتۇسىپ قالماس ءۇشىن قۇقىق قورعاۋ ورگاندارى ازاماتتاردى قاراپايىم ەرەجەلەردى ۇستانۋعا شاقىرادى: قىزمەتتەردى ۇسىناتىن ادامداردىڭ قۇجاتتارى مەن وكىلەتتىكتەرىن تەكسەرۋ، رەسمي كەلىسىمشارتتارسىز بەيتانىس ادامدارعا اقشا بەرمەۋ جانە كۇدىكتى ادامدار تۋرالى پوليسياعا دەرەۋ حابارلاۋ. ءسىزدىڭ قاراجاتىڭىزدىڭ قاۋىپسىزدىگى ءسىزدىڭ قولىڭىزدا ەكەنىن ۇمىتپاڭىز!
