قازىرگى كەزدە اتالعان اۆياسيا قىزمەتى بارلىق وبلىس ورتالىقتارىندا ورنالاسقان 24 ۇشاق پەن 13 تىكۇشاقتى پايدالانادى. ولاردىڭ بارلىعى قازاقستان رەسپۋبليكاسىنىڭ ازاماتتىق اۆياسيا كوميتەتىندە سەرتيفيكاتتالعان.
نازيگۇل ىرىمبايەۆا اتاپ وتكەندەي، ءاربىر كەزەكشىلىك – قۇتقارىلعان ءومىر. ءدال وسى مەديسينالىق اۆياسيا مارشرۋتتىڭ قيىندىعىنا قاراماستان، كومەككە مۇقتاج جەرلەرگە ۇشىپ كەلەدى. بارلىق ۇشاقتار مەن تىكۇشاقتار جوعارى تەحنولوگيالىق زاماناۋي مەديسينالىق جابدىقتارمەن تولىق جابدىقتالعان، بۇل پاسيەنتتەرگە نەعۇرلىم ىڭعايلى، ءقاۋىپسىز جانە بارىنشا جىلدام مەديسينالىق كومەك كورسەتۋگە ىقپال ەتەدى.
– 2011 جىلدان باستاپ 2021 جىلدىڭ قىركۇيەگىنە دەيىنگى بارلىق قىزمەت كەزەڭىندە مەديسينالىق اۆياسيا جەلىسى بويىنشا ورىندالعان ۇشۋلار سانى 20 161 ۇشۋدى قۇرادى. ۇشۋ سانى جىل سايىن ارتىپ كەلەدى. اۆياسيانىڭ ارقاسىندا بىزدە اۆتوكولىكتەن ەكى نەمەسە ءۇش ەسە جىلدام جەردە بولۋ مۇمكىندىگى پايدا بولادى. پاسيەنتتى تاسىمالداۋ تۋرالى ءسوز بولعاندا، بۇل شەشۋشى فاكتورعا اينالۋى مۇمكىن، – دەپ اتاپ ءوتتى نازيگۇل ىرىمبايەۆا.
مەداۆياسيا جەتىستىكتەرىنىڭ تىزىمىندە 35 وپەراسيا، دونورلىق ورگانداردى الۋ جانە تاسىمالداۋ ءۇشىن 75 ۇشۋ جۇزەگە اسىرىلدى. ايتا كەتۋ كەرەك، ەل ىشىندەگى شاقىرۋلاردان باسقا، دارىگەرلەر ق ر ازاماتتارى مەن شەتەلدە قيىن جاعدايداعى قانداستاردى حالىقارالىق تاسىمالداۋدى جۇزەگە اسىرادى. بۇكىل كەزەڭ ىشىندە الەمنىڭ 24 ەلىنە 90 شەتەلدىك ۇشۋ ورىندالدى.
نازيگۇل ىرىمبايەۆا جىل سايىن رەسپۋبليكادا مەداۆياسياعا شاقىرۋلار سانى بىرتىندەپ ارتىپ كەلە جاتقانىن حابارلادى. بۇل حالىقتىڭ حاباردار بولۋىنىڭ ارتقانىن كورسەتەدى.
– 2011 جىلدان باستاپ قازىرگى ۋاقىتقا دەيىن 26 576 پاسيەنتكە مەديسينالىق كومەك كورسەتىلدى. پاسيەنتتەردىڭ جالپى سانىنىڭ 22%-ى – پاتولوگياسى بار بالالار، 20%-ى - دپ، جازاتايىم وقيعالار مەن ۋلانۋلار ناتيجەسىندە جاراقاتتارى بار پاسيەنتتەر، 17%-ى-اكۋشەرلىك پراكتيكاداعى شۇعىل جاعدايلار بويىنشا پاسيەنتتەر، 16%-ى-قان اينالىمى جۇيەسى اۋرۋلارىمەن، 14%-ى-جاڭا تۋعان نارەستەلەر جانە 11%-ى-وزگە دە اۋرۋلارمەن. بۇل تەك ساندار عانا ەمەس، ءار ۇشۋدىڭ ارتىندا ۋاقىتىلى جەدەل مەديسينالىق كومەك كورسەتىلگەن ادامداردىڭ تاعدىرى تۇر، – دەپ اتاپ ءوتتى مەديسينالىق ءبولىمنىڭ مەڭگەرۋشىسى.
بارلىعى 28 860 مەديسينالىق قىزمەت كورسەتىلدى، ونىڭ ىشىندە: 19 286 پاسيەنت مەديسينالىق ۇيىمدارعا تاسىمالداندى، 1526 وپەراسيا جاسالدى، 4242 كۇندىزگى كەڭەس وتكىزىلدى.
شۇعىل مەديسينالىق كومەك دەنساۋلىق ساقتاۋ جۇيەسىنىڭ ماڭىزدى بۋىنى بولدى جانە بولىپ قالا بەرەدى، ونىڭ جۇمىسىنىڭ تيىمدىلىگىنە حالىقتىڭ دەنساۋلىعى مەن ءومىرىن ساقتاۋ ايتارلىقتاي تاۋەلدى. ونى ۇيىمداستىرۋ دەڭگەيى انا مەن بالا ءولىمى، ينفاركت، ينسۋلت جانە باسقا دا كوپتەگەن ماڭىزدى كورسەتكىشتەردىڭ تومەندەۋىنە تىكەلەي اسەر ەتەدى.
نازيگۇل ىرىمبايەۆانىڭ ايتۋىنشا، پاندەمياعا بايلانىستى مەداۆياسيا بريگادالارى كوروناۆيرۋسپەن اۋىراتىن ناۋقاستاردى تاسىمالداۋعا دايىن.
– اۋە كەمەلەرىنىڭ بورتىندا ءبىز پاسيەنتتەردىڭ دە، مەديسينا قىزمەتكەرلەرىنىڭ دە ينفەكسيالىق قاۋىپسىزدىگىن قامتاماسىز ەتەمىز. COVID-19 بار پاسيەنتتەردى تاسىمالداعاننان كەيىن اۋە جانە جەر ءۇستى كولىگىن سانيتارلىق وڭدەۋگە ەرەكشە كوڭىل بولىنەدى، – دەدى سپيكەر.
مەديسينالىق اۆياسيا قىزمەتى COVID-19 كوروناۆيرۋس ينفەكسياسىمەن كۇرەس اياسىندا 2020 جىلعى ناۋرىزدان باستاپ جانە 2021 جىلعى 9 ايدا 249 ۇشۋدى جۇزەگە اسىردى، 1160 پاسيەنتكە كومەك كورسەتتى.
ءسوزىن قورىتىندىلاي كەلە، نازيگۇل ىرىمبايەۆا سيتۋاسيالىق ورتالىقتىڭ تاۋلىك بويى جۇمىس ىستەپ جاتقانىن، ونىڭ ماماندارى ساراپتامالىق توپپەن بىرلەسىپ، تۇراقتى نەگىزدە انەستەزيولوگيا، رەانيماسيا جانە قارقىندى تەراپيا بولىمشەسىندەگى پنيەۆمونيانىڭ اۋىر تۇرىمەن اۋىراتىن جاعدايى اۋىر پاسيەنتتەرگە كۇندەلىكتى مونيتورينگ جانە تالداۋ جۇرگىزەتىنىن حابارلادى. جىل باسىنان مەديسينا ماماندارى مۇنداي پاسيەنتتەر ءۇشىن 182 872 كەڭەس وتكىزدى.
