“بۇگىن ءبىز ءۇشىن اۋىر كۇن. ءبىز ايان عالييەۆ جانە عاني نۇريمانوۆپەن قوشتاسىپ جاتىرمىز. ايان جاراقات العانىنا قاراماستان، قارسىلاستى دا جارالاپ، قانشاما ادامدى امان ساقتاپ، ءوزى ءولىپ كەتتى. ول ناعىز كاسىبيلىكتىڭ ۇلگىسىن كورسەتە الدى. وتستاۆكاداعى قىزمەتكەر عاني قىزمەتتىك پارىزى ادال اتقاردى. ارىپتەستەرى ونىڭ جاۋاپكەرشىل، سىيلى ادام بولعانىن ايتادى”، – دەدى اكىم.
شاھار باسشىسى بۇل ازاماتتاردىڭ قانداي قۇرمەتكە دە لايىق، ناعىز باتىر ەكەنىن ايتتى. قازا تاپقانداردىڭ بالالارى تۋرالى ايتقان باۋىرجان بايبەك كوز جاسىنا ەرىك بەردى.
“اياننىڭ ارتىندا 10 جاسار قىزى مەن 7 ايلىق ۇلى قالدى. كەشە مەن اتا-اناسىنىڭ ۇيىندە بولدى. ولار نەمەرەسىن 10 جىل بويى كۇتكەن ەكەن. ايان ءوز ۇلىنىڭ باتىر بولعانىن قالاعان. ال عاني نۇريمانوۆتىڭ ارتىندا ەكى بىردەي ۇلى قالدى. وزگە قازا تاپقان پوليسەيلەردىڭ دە بالالارى بار”، – دەدى قالا باسشىسى.
“اتا-انالارى بالالارىن ناعىز پاتريوت، وتان سۇيگىش ازامات ەتىپ تاربيەلەگەن. سىزدەر ءبىزدىڭ جۇرەگىمىزدە ماڭگى قالاتىن باتىرلاردى تاربيەلەدىڭىزدەر. پوليسەي بولۋ – ءومىرىڭدى تاۋەكەلگە تىگۋ. ەلباسى بارلىق قازا تاپقانداردىڭ وتباستارىنا كوڭىل ايتادى. ەشكىم دە قولداۋسىز قالمايدى. بارلىق وتباسىلار ماتەريالدىق كومەك الادى”، – دەدى اكىم.
قالا اكىمى سونداي-اق، جاعدايمەن تۇسىنىستىكپەن قاراعان جانە قان تاپسىرعان تۇرعىندارعا دا ەرەكشە العىسىن ءبىلدىردى.
ەسكە سالا كەتەيىك، تەرروريستىك اكت كەزىندە قۇقىق قورعاۋ ورگاندارىنىڭ ءۇش قىزمەتكەرى – 28 جاستاعى پوليسيا كاپيتانى باۋىرجان نۇرمۇحانبەتوۆ، 24 جاستاعى پوليسيا سەرجانتى ماقسات سالىمبايەۆ جانە 42 جاستاعى پوليسيا ستارشيناسى ايان عالييەۆ قازا تاپقان ەدى. 19 شىلدە كۇنى پوليسيا لەيتەنانتى، جپپ مامانداندىرىلعان باتالون قىزمەتىنىڭ اعا ينسپەكتورى 29 جاستاعى تيمۋر بەگاسىلوۆتىڭ اۋرۋحانادا قايتىس بولعانى بەلگىلى بولدى.
سونداي-اق بۇگىن الماتى جانە جامبىل وبلىستارىندا ماقسات سالىمبايەۆتى جانە باۋىرجان نۇرمۇحانبەتوۆتى جەرلەۋ ءراسىمى وتۋدە.
دەرەككوز: stan.kz
