الماتىدا تاريحي نىسان - يپپودروم بۇزىلىپ، ورنىنا تۇرعىن ءۇي سالىنۋى مۇمكىن دەگەن اقپارات تارادى. بۇعان قاتىستى "تەنگري ينۆەست" ج ش س جانە اكىمدىك رەسمي مالىمدەمە جاسادى، دەپ حابارلايدى Dalanews.kz.
ءبىرقاتار بۇقارالىق اقپارات قۇرالى مەن الەۋمەتتىك جەلىلەردە الماتى يپپودرومىنىڭ اۋماعىندا تۇرعىن ءۇي كەشەنى سالىنادى دەگەن اقپاراتتىڭ تارالۋىنا بايلانىستى "تەنگري ينۆەست" ج ش س رەسمي تۇردە بۇل مالىمەتتەردىڭ شىندىققا جاناسپايتىنىن حابارلادى.
"تاريحي يپپودروم اۋماعىندا ەشقانداي قۇرىلىس جۇمىستارى جۇرگىزىلىپ جاتقان جوق، سونداي-اق تۇرعىن ءۇي نەمەسە كوممەرسيالىق نىساندار سالۋ جوسپارى دا جوق. يپپودروم بۇرىنعىداي جۇمىس ىستەپ تۇر، وندا ات سپورتى جارىستارى وتكىزىلىپ، ۇلتتىق سپورت تۇرلەرىن دامىتۋ ءىسى جالعاسىپ كەلەدى"، – دەدى "تەنگري ينۆەست" ج ش س ديرەكتورى ەرجان مايلىبايەۆ.
الماتى قالاسى اكىمدىگى دە بۇل اقپاراتتىڭ نەگىزسىز ەكەنىن راستادى.
"ەگجەي-تەگجەيلى جوسپارلاۋ جوباسىنا سايكەس، اتالعان اۋماق يپپودروم رەتىندە بەكىتىلگەن، ال ونى بۇزۋ جونىندە ەشقانداي رۇقسات بەرىلگەن جوق"، - دەپ حابارلادى اكىمدىك.
الماتى يپپودرومى – تاريحى تەرەڭ ءارى مادەني ماڭىزى زور نىسان بولىپ قالا بەرەدى. مۇندا ءداستۇرلى تۇردە ەلىمىزدەگى ات سپورتى مەن ۇلتتىق مادەنيەتتى ناسيحاتتاۋعا باعىتتالعان ءىرى سپورتتىق جانە قوعامدىق ءىس-شارالار وتكىزىلىپ كەلەدى.
ايتا كەتەيىك، بۇل ماسەلەنى جۋرناليست نۇرسەيىت جىلقىشىباي كوتەرگەن بولاتىن.
"الماتىدا 1930 جىلى سالىنعان تاريحي يپپودروم بىرەۋلەردىڭ كوز قۇرتىنا اينالىپتى. 40 گەكتاردان استام جەر قىپ-قىزىل اقشا عوي. سوعان تارسىلداتىپ تۇرعىن ءۇي سالماقشى. سوندا تاريحي نىساننىڭ قۇنى كوك تيىن با؟"، - دەگەن ەدى جۋرناليست.
