بۇگىن Central Asia ايماعىنداعى العاشقى باعدارلامالاۋ مەكتەبى Alem School ءوزىنىڭ بەس جىلدىق مەرەيتويىن اتاپ ءوتتى، – دەپ حابارلايدى Dalanews.kz.

مەرەيتوي اياسىندا ستۋدەنتتەر، تۇلەكتەر، سەرىكتەستەر جانە IT سالاسىنىڭ جەتەكشى وكىلدەرىن جيناعان سالتاناتتى ءىس-شارا ءوتتى. ءىس-شارا Rixos President Astana قوناق ۇيىندە وتكىزىلدى، وندا قاتىسۋشىلار الەمنىڭ تۇكپىر-تۇكپىرىنەن كەلگەن IT ماماندارىمەن تاجىريبە الماستى، جاڭا يدەيالار مەن مۇمكىندىكتەردى تالقىلاپ، ساندىق بولاشاققا قادام جاساۋ مۇمكىندىگىنە يە بولدى.

بەس جىل ىشىندە Alem School جەتەكشى ءبىلىم بەرۋ ورتالىعى رەتىندە تانىلدى جانە Tesla، Google، Amazon سياقتى الەمدىك كومپانيالاردا جانە Kaspi، InDrive، Forte Bank سياقتى قازاقستاننىڭ ەڭ ءىرى كومپانيالارىندا جۇمىس ىستەيتىن 600-دەن استام جوعارى بىلىكتى مامان دايارلادى.

– ءبىزدىڭ ماقساتىمىز – ستۋدەنتتەردى تەك باعدارلامالاۋعا عانا ەمەس، شىعارماشىلىق ويلاۋ قابىلەتتەرىن دامىتۋعا ۇيرەتۋ، سوندا ولار قازىرگى ەڭبەك نارىعىنىڭ تالاپتارىنا بەيىمدەلە الادى. ءبىز قازاقستان مەن الەمنىڭ IT سالاسىن دامىتۋعا ەلەۋلى ۇلەس قوساتىن مامانداردى دايارلاۋدى جالعاستىرامىز، – دەپ اتاپ ءوتتى Alem School ديرەكتورلار كەڭەسىنىڭ ءتوراعاسى ەرمەك كۇزەنبايەۆ.

مەكتەپ ستۋدەنتتەردىڭ ناقتى جوبالارمەن جۇمىس ىستەۋىنە نەگىزدەلگەن بىرەگەي مودەل بويىنشا جۇمىس ىستەيدى. ءداستۇرلى وقۋ ورىندارىنان ايىرماشىلىعى، مۇندا دارىستەر مەن وقىتۋشىلار جوق – ستۋدەنتتەر بىر-بىرىنە ۇيرەتەدى جانە پراكتيكالىق داعدىلاردى دامىتادى، بۇل ولارعا ەڭبەك نارىعىندا سۇرانىسقا يە مامان بولۋعا كومەكتەسەدى.

Alem School ءوز جۇمىسىن باستاعاننان بەرى 16 نابور ۇيىمداستىرىپ، 920-دان استام ستۋدەنت قابىلدادى. قازىرگى ۋاقىتتا مەكتەپتە 350-دەن استام ستۋدەنت وقىپ جاتىر.

– ءبىز تۇلەكتەرىمىزدىڭ جەتىستىكتەرىمەن ماقتانامىز جانە كەلەسى 5 جىلدا Alem پلاتفورماسىن دامىتۋ، جاڭا تەحنولوگيالار مەن ادىستەمەلەردى ەنگىزۋ ارقىلى حالىقارالىق IT نارىعىنا قوسىمشا ماماندار دايارلايتىنىمىزعا سەنىمدىمىز، – دەدى ەرمەك كۇزەنبايەۆ.

Alem School ءوز ميسسياسىن ورىنداۋدى جانە ستۋدەنتتەردىڭ كاسىبي وسۋىنە مۇمكىندىكتەر ۇسىنۋدى جالعاستىرۋدا.