ۇشاقپەن ۇشۋ الماتى كوشەلەرىندە كولىكپەن جۇرۋدەن ءقاۋىپسىز. وسىلاي دەگەن «Air Astana» اۋە كومپانياسىنىڭ قىزمەتكەرلەرى ءبىر اپتانىڭ ىشىندە ءۇش بىردەي ۇشاقتىڭ شۇعىل جاعدايدا قونۋىن كەزدەيسوقتىق دەپ باعالادى. ويتكەنى ءۇش رەتتە دە اۋە كەمەلەرىنەن اقاۋ شىققان ەكەن. ال تانىمال ەكونوميكا شولۋشىسى «Air Astana» اۋە ساپارلارىندا بولعان وقىس وقيعالاردى جاسىرىپ، ۇنەمى قۇپيا ۇستايدى، – دەپ سىناپ وتىرعانىن 31 ارنا حابارلادى.

ەكونوميكا شولۋشىسى كريۆوشەيەۆتىڭ ايتىپ وتىرعانى «Air Astana» ۇشاعى 2012 جىلى اتىراۋدان ىستامبۇل قالاسىنا ۇشقاندا وقىس وقيعا بولىپ، «ەيرباس» اۋە كەمەسىنىڭ قۇرىلىمىنا زاقىم كەلگەن. بەس جىل وتسە دە ەش جەردە ايتىلماعان جاعدايدى ول ءوز پاراقشاسىندا فوتو دالەلدەرمەن جاريالادى. «ەيرباستىڭ» شاناعىنا سىزات ءتۇسىپ، ۇشاق ۇزاق ۋاقىتقا دەيىن جوندەۋدە تۇرىپتى. جۇزدەگەن ادامداردىڭ تاعدىرى تۇرعاندا مۇنداي وقيعالاردىڭ بولعانىن جىلى جاۋىپ قويىپ، قوعامعا اشىق اقپارات تاراتپاۋدى حالىقپەن ساناسپاۋىنان كوردى. وزكەزەگىندە ەكونوميكالىق شولۋشى دەنيس كريۆوشەيەۆ:

– كۇردەلى جاعداي بولسا دا، بۇل توتەنشە وقيعا تۋرالى بىزدە ەشكىمگە ايتپادى. تۇركيانىڭ اۆياسيا قىزمەتى ۋاقىتىندا حابار تاراتتى. ءبىز بىلمەي قالعان قانشاما وقيعالار بولىپ جاتىر؟ كومپانيا بارىمىزگە اشىق بولۋى ءتيىس. وسى جايتتاردى ازاماتتىق اۆياسيا كوميتەتىنەن دە تالاپ ەتۋ كەرەك، – دەدى.

ال «Air Astana» قىزمەتكەرلەرى ءار بولعان وقىس وقيعانى ءتيىستى ورگاندارعا باياندايمىز، ال كوپشىلىككە ايتۋعا مىندەتتى ەمەس ەكەنىن العا تارتتى. جاقىندا «الماتى-ورال» باعىتىنداعى  ۇشاقتىڭ اپاتتىق جاعدايدا اقتوبەگە قونعانى تۋرالى (گرافيكا) اقپاراتتى دا كومپانيا تاراتپاپتى. 2016 جىلى «Air Astana» رەيستەرىندە  35 رەت ايتارلىقتاي ءقاۋىپتى وقيعا بولعان. ولاردىڭ كوپشىلىگى اۋە كەمەسىنە قۇستاردىڭ سوعىلۋى مەن اۋا-رايىنىڭ قولايسىزدىعىنان ورىن الىپتى. «Air Astana» اۋە كومپانياسىنىڭ تەحنيكالىق قىزمەت كورسەتۋ بويىنشا اعا مەنەدجەرى سەرگەي ماكارەنكو:

– بۇل «Air Astana» كومپانياسىنا قاتىسى جوق نارسەلەر. مىسالى، الماتىدا، اتىراۋدا قۇستارمەن سوقتىعىسۋ جيىلەگەن ەدى. ونىڭ الدىن الۋ اۋەجايدىڭ، ءتىپتى اكىمدىكتىڭ مىندەتىنە كىرەدى. ال كەيدە نايزاعاي سوققىسى بولادى. سىرتقى فاكتورلاردىڭ دا اسەرى جوعارى، – دەپ ءوز پىكىرىن ءبىلدىردى.

ەلىمىزدەگى بيلەت قۇنى ەڭ جوعارى، ءارى ەڭ سەنىمدى دەپ سانالاتىن كومپانيا ۇشاقتارىنان اقاۋ شىعىپ، كەزەك-كەزەك شۇعىل جاعدايدا قونعاننان كەيىن كوپشىلىكتىڭ قورقىنىشى مەن كۇمانى ۇلعايعان بولاتىن. "ۇشاقتاردىڭ بارلىعى ۇزدىكسىز باقىلاۋدا، ال ۇشقىشتار دا ەۋروپاعا بارىپ، ارنايى ترەنينگتەن وتەدى" دەگەن كومپانيا بولعان كەلەڭسىزدىكتەردى قايتالانباس ءۇشىن بۇدان بىلاي قىزمەت ساپاسىن ودان سايىن ارتتىرۋعا بەكىنگەن سياقتى.

 

ماناس قايىرتاي، رينات ابۋلحايروۆ