2029 جىلعا قاراي ەلوردانىڭ جالعىز قوقىس پوليگونى تولىقتاي تولادى. بۇل تۋرالى استانا قالاسى بويىنشا قورشاعان ورتانى قورعاۋ جانە تابيعاتتى پايدالانۋ باسقارماسىنىڭ باسشىسى داۋلەت دوسقۇلوۆ ءماسليحات وتىرىسىندا ايتتى، دەپ حابارلايدى Dalanews.kz.
ۆەدومستۆو جەتەكشىسىنىڭ سوزىنشە، سوڭعى جىلدارى تۇرمىستىق قالدىقتاردىڭ كولەمى كۇرت ءوسىپ وتىر.
"2023-2024 جىلدارى شامامەن 550 مىڭ توننا قوقىس شىعارىلدى. 2025 جىلدىڭ سوڭىنا قاراي بۇل كورسەتكىش 600 مىڭ توننادان اسادى دەپ كۇتىلۋدە. بۇعان حالىق سانىنىڭ ارتۋى جانە تۇرعىن ءۇي قۇرىلىسىنىڭ قارقىندى ءجۇرۋى سەبەپ بولىپ وتىر"، – دەدى دوسقۇلوۆ.
ونىڭ ايتۋىنشا، قالدىقتاردى بولەك جيناۋ ماسەلەسى دە وزەكتى كۇيىندە قالىپ وتىر. قازىرگى تاڭدا بۇل جۇيەمەن حالىقتىڭ 40%-دان از بولىگى عانا قامتىلعان.
"پلاستيك، اينەك پەن قاعازدىڭ تاماق قالدىقتارىمەن ارالاسۋى ولاردىڭ قايتا وڭدەلۋىن مۇمكىن ەمەس ەتەدى. بۇعان ينفراقۇرىلىمنىڭ جەتكىلىكسىزدىگى، ەكولوگيالىق مادەنيەتتىڭ تومەندىگى جانە ىنتالاندىرۋدىڭ جوقتىعى سەبەپ"، – دەدى باسقارما باسشىسى.
2024 جىلى ەلوردادا جينالعان قوقىستىڭ تەك 17%-ى عانا سۇرىپتالىپ، قايتا وڭدەۋگە جىبەرىلگەن. ال ءقازىر قولدانىستاعى ەكىنشى ۇياشىق تولىپ قالعان، ال ءۇشىنشى ۇياشىقتىڭ رەسۋرستارى قازىرگى قارقىنمەن 2028-2029 جىلدارى تولىق سارقىلادى.
"بۇل ەكولوگياعا ايتارلىقتاي ءقاۋىپ توندىرەدى. سەبەبى قالدىقتاردى سۇرىپتايتىن زاۋىتتىڭ جابدىقتارى ەسكىرگەن، قۋاتى جەتكىلىكسىز. سونىمەن قاتار زاماناۋي تەحنولوگيا مەن ينۆەستيسيانىڭ جوقتىعى، بيزنەس پەن حالىقتىڭ بەلسەندىلىگىنىڭ تومەندىگى دە جاعدايدى ۋشىقتىرىپ وتىر"، – دەدى دوسقۇلوۆ.
