ورتالىق كىتاپحانا جۇيەسىنىڭ چەحوۆ اتىنداعى كىتاپحاناسىندا الماتى قالاسى مادەنيەت باسقارماسىنىڭ باستىعى مىندەتىن اتقارۋشى الييەۆ دانيار ابزاليدەن ۇلى، الماتى ق. مەدەۋ اۋداندىق مادەنيەت ءبولىمىنىڭ باستىعى ساكەن جاببار ۇلى ارالبايەۆ ت.ب. مەكەمەلەر مەن ۇيىمدار وكىلدەرىنىڭ قاتىسۋىمەن مەرەكەگە وراي سالتاناتتى جيىن بولىپ ءوتتى.
بۇل مەرەكە بيىل توعىزىنشى رەت اتالىپ ءوتتى.
كىتاپحاناشىلار قاۋىمىنىڭ ۇنەمى ءتۇرلى ءىس-شارالار وتكىزىپ، مەملەكەتتىك باعدارلامالاردى جانە اسا ماڭىزدى الەۋمەتتىك-ساياسي، مادەني جوبالاردى ناسيحاتتاۋمەن جۇيەلى تۇردە اينالىسىپ كەلە جاتقانىن، ەلباسى جاريالاعان رۋحاني جاڭعىرۋ جانە تۋعان جەر باعدارلامالارى اياسىندا وقىرماندارمەن تابىستى تۇردە جۇمىس ىستەپ جۇرگەنىن مادەنيەت باسقارماسى اتىنان دانيار ابزاليدەن ۇلى اتاپ ءوتتى. «كىتاپحانالار جۇيەسى ءبىزدىڭ باسقارمامىزبەن تۇراقتى قاتىناس جاساپ، ۇنەمى قالامىزدا وتكىزىلىپ جۇرگەن قانداي دا بولسىن ساياسي-مادەني ءىس-شارالاردىڭ باسى-قاسىندا جۇرەدى، ولاردىڭ مادەنيەت وشاعى دەپ اتالۋى بەكەر ەمەس»، – دەي كەلە، مادەنيەت باسقارماسىنىڭ باسشىسى كىتاپحاناشىلار ۇجىمىن ماقتاۋ گراموتالارىمەن ماراپاتتادى.
مەدەۋ اۋدانى اكىمدىگىنىڭ مادەنيەت ءبولىمى باسشىسى ساكەن جاببار ۇلى كىتاپحاناشىلاردى كاسىبي مەرەكەسىمەن شىن جۇرەكتەن قۇتتىقتاي وتىرىپ، كىتاپحانا جۇيەسىنىڭ باستىعى قابييەۆا روزا قاسىمبەك قىزى مەن مەدەۋ اۋدانىنداعى № 32 كىتاپحانا مەڭگەرۋشىسى بايماحانبەتوۆا ايشا بايماحانبەت قىزى قالامىزدىڭ الەۋمەتتىك-ساياسي جانە مادەني ومىرىنە ەرەكشە ەڭبەك ءسىڭىرىپ جۇرگەنىن اتاپ كورسەتتى. «ماسەلەن، بيىلعى جىلى قالامىزدا قازاقتىڭ ۇلى اقىنى اباي اتىنداعى داڭعىل، تولە بي كوشەسى، دوستىق داڭعىلى كوشەلەرىنە ارنالعان مەرەكەلەر، سونىمەن قاتار كونستيتۋسيا كۇنى، «الماتى – وقىرمان قالا»، «كىتاپفەست» مەرەكەلەرى جوعارى دەڭگەيدە ۇيىمداستىرىلىپ، وتكىزىلدى». بۇل ورايدا اۋدان باسشىسى ەرجان جۇمات ۇلى جىلقىبايەۆ كىتاپحاناشىلاردىڭ وراسان زور ەڭبەگىنە جوعارى باعا بەرگەنىن اتاپ ءوتىپ، مادەني ءىس-شارالاردا بەلسەندىلىك تانىتىپ، ەرەكشە كوزگە كورىنگەن كىتاپحانا قىزمەتكەرلەرىن اۋدان اكىمدىگىنىڭ العىس حاتتارىمەن ماراپاتتادى.
كىتاپحاناشىلار ءوز ەڭبەكتەرىنىڭ ەلەنىپ، وسىنداي زور قۇرمەتكە يە بولىپ وتىرعانىن، ءوز ماماندىقتارىن ماقتانىش تۇتىپ، جاس كىتاپحاناشىلاردىڭ ماراپات العانى ولارعا جىگەر، رۋح بەرەتىنىنە سەنىمىمىز مول.
قۋانىش باقىت
