ەلىمىزدىڭ مەتەورولوگتارى وزدەرىنىڭ جالاقىسىنىڭ ماردىمسىزدىعىنا شاعىمدانىپ، ماجىلىسكە ۇجىمدىق حات جولدادى. ونى بۇگىن، 18 جەلتوقساندا دەپۋتات اجار ساعىندىقوۆا ۇكىمەتكە جەتكىزىپ، وسى ساناتتاعى قىزمەتكەرلەردىڭ جالاقىسىن 100%-عا ارتتىرۋدى سۇرادى، دەپ جازادى Dalanews.kz.
ينفلياسياسى اي سايىن كۇشەيگەن قازاقستاندا ايلىعى 120 مىڭ تەڭگە بولاتىن مەتەورولوگيا سالاسىنىڭ ماماندارىنا وتباسىن اسىراۋ قيىنعا سوعۋدا.
"قازگيدرومەتتىڭ" بولجامدارىن اۋىل شارۋاشىلىعىنان اۆياسياعا دەيىنگى ءتۇرلى سالاداعى كاسىپورىندار پايدالانادى. مەتەورولوگتار مەتەوستانسيالاردا وتىرا بەرمەيدى، جىلۋى، سۋ جوق شالعاي اۋماقتا ورنالاسقان كونتەينەرلەردە تاۋلىك بويى كەزەكشىلىك ەتەدى. تاۋعا دا، تاسقا دا شىعىپ، ولشەمدەر جۇرگىزەدى. ال وسىنداي اۋىر جۇمىس جاعدايىنا قاراماستان تەحنيكتەر وتە تومەن جالاقى الادى"، — دەدى اجار ساعىندىقوۆا ءماجىلىستىڭ جالپى وتىرىسىندا.
دەپۋتاتتتىڭ ايتۋىنشا، 2023 جىلدىڭ ماۋسىم ايىندا مەتەورولوگتاردىڭ جالاقىسى 70%-عا ۇلعايعانىمەن، ولار ۋادە ەتىلگەن 100%-عا وسپەگەن. سونداعىسى - 120 مىڭ تەڭگە.
"مىسالى، قار جاۋۋ كەزىندە تۇسىرىلەتىن تۇسىرىلىمگە بار بولعانى 1200 تەڭگە تولەنەدى. تەحنيكتەر، كوبىنە دالادا،ەلدىمەكەندەردەن 2-3، 5 شاقىرىم قاشىقتىقتا جۇرەدى. ولارعا جابايى جانۋارلار كەزىگۋ تاۋەكەلى جوعارى، ءبىراق ەڭبەك جاعدايلارى دۇرىس باعالانبايدى"،— دەپ تۇسىندىرەدى دەپۋتات.
سونىمەن قاتار، اجار ساعىندىقوۆا مەتەوستانسيا قىزمەتكەرلەرى جۇمىس ۋاقىتىنىڭ جيىنتىق ەسەبىنە بايلانىستى تولىق جالاقى الا المايتىنىن اتاپ ءوتتى.
"ولار ايىنا كەم دەگەندە 10 ساعات ارتىق جۇمىس ىستەيدى، ءبىراق ۇستەمەاقى تەك جىلدىڭ سوڭىندا تولەنەدى. ونىڭ ۇستىنە، دەمالىس جانە دارىگەرگە قارالۋعا سۇرانعان كەزدەگى ساعاتتارى وسى ارتىق جۇمىستان شەگەرىلەدى. سىياقى دەگەن مۇلدە قاراستىرىلمايدى"، - دەدى ول.
دەپۋتات مەتەورولوگ-تەحنيكتەردىڭ جالاقىسىن 100%-عا ارتتىرۋدى، سونداي-اق ولارعا قوسىمشا جۇمىستارى ءۇشىن ۇستەمەاقى تولەۋدى جانە قوسىمشا دەمالىس كۇندەرىن بەرۋدى ۇسىندى.
"مەملەكەتتىك جانە باسقا دا مەرەكەلەرگە ارنالعان سىيلىقاقىلاردى دا قاراستىرۋ قاجەت"، — دەپ ءسوزىن تولىقتىردى اجار ساعىندىقوۆا.
بۇعان دەيىن ۇلىتاۋ وبلىسىندا كەنشىلەر ەرەۋىلگە شىققانىن،"قازاقمىس" جۇمىسشىلارى جالاقىسىن وسىرەتىن بولعانىن جازعانبىز.
