Тұрғындардың экологиялық бұзушылық бойынша жаппай шағымдарынан кейін ШҚО-да Риддер қаласындағы кәсіпорындардың бірінің жұмысы үш айға тоқтатылды. Жоғары сот осындай шешім шығарды, деп хабарлайды Dalanews.kz.
Тұрғындар шағымынан кейін жүргізілген жоспардан тыс тексеру нәтижесінде ЖШС өзі жалға алған аумақта өндірістік қалдықтарды қайта өңдеу зауытының құрылысына дайындық жұмыстары аясында конструкцияларды құрастыру бойынша дәнекерлеу жұмыстарын және алаңды тазарту бойынша жер қазу жұмыстарын жүргізгені анықталды.
"Бұл ретте қоршаған ортаға эмиссиялар міндетті экологиялық рұқсатсыз есепке алынған, бұл Экологиялық кодекстің 106-бабын бұзу болып табылады және ӘҚБтК-нің 328-бабының 4-бөлігіне жатады. ЖШС-нің басқарушы директоры сотта арбаларды дәнекерлеудің шамалы ғана жүргізілгенін, оның пікірінше, қазу жұмыстары жүргізілмегенін түсіндірді. Тек аумақты тазалау жұмыстары жүргізілген, оны қазу жұмыстарымен теңестіруге болмайды. Сондай-ақ бұл бағыттағы іс-шараларды тоқтатып, қаланың индустриалды аймағынан басқа учаскені таңдап, техникаларды сол жерге жоспарлы түрде көшіру туралы баяндады. Бірақ ол жауапкершілігі шектеулі серіктестікте (ЖШС) қажетті экологиялық рұқсаттың жоқтығын жоққа шығармады", делінген Жоғары сот хабарламасында.
ЖШС өкілдері кінәларын мойындамай, олардың әрекеті құрылыс жұмыстарының сипатына жатпайтынын алға тартқанына қарамастан, сот құрылыс-монтаждау қызметінің басталуы және рұқсат құжатының жоқтығы фактісін анықтады, бұл тұрғындар ұсынған тексеру актілерімен және фотоматериалдармен расталады.
Әкімшілік құқық бұзушылық істері жөніндегі мамандандырылған сот істі оқиға орнында қарап, ЖШС-нің әрекеті қоршаған ортаға кері әсерін тигізген деген қорытындыға келді. ЖШС ӘҚБтК-нің 328-бабының 4-бөлігімен кінәлі деп танылып, оған әкімшілік жаза тағайындалды: үш айға қызметке тыйым салумен 1,9 млн теңге айыппұл салынды.
Қаулы заңды күшіне енген жоқ.
