«Қазгидромет» РМК 29 желтоқсан күні Қазақстанның бірқатар өңірінде ауа райының қолайсыз болуына байланысты дауылды ескерту жасады, деп хабарлайды Dalanews.kz

Синоптиктердің болжамынша, елдің көптеген аймағында қар, бұрқасын, тұман, көктайғақ және желдің күшеюі күтіледі. Желдің екпіні кей өңірлерде секундына 15–20 метрге дейін жетеді.

Атап айтқанда, Қызылорда облысында түнде және таңертең жолдарда көктайғақ болып, облыстың солтүстігі мен орталығында тұман түседі. Жел оңтүстік-шығыстан соғып, күндіз күшейеді.

Батыс Қазақстан, Ақмола, Қостанай, Солтүстік Қазақстан, Ұлытау және Ақтөбе облыстарында қар жауып, жаяу бұрқасын мен көктайғақ күтіледі. Кей аймақтарда тұман байқалады. Желдің екпіні 15–20 м/с-қа дейін жетуі мүмкін.

Алматы, Жетісу, Жамбыл және Түркістан облыстарында тұман түсіп, таулы және тау асулары бар өңірлерде көктайғақ болады. Жел күшейіп, әсіресе таулы аймақтарда қауіп артады.

Қарағанды, Павлодар, Абай, Шығыс Қазақстан және Маңғыстау облыстарында да тұман мен көктайғақ күтіледі, кей өңірлерде қар мен бұрқасын болады.

Ірі қалаларда, соның ішінде Алматы, Атырау, Орал, Қостанай, Тараз, Талдықорған және Жезқазған қалаларында тұман, көктайғақ және желдің күшеюі болжанып отыр.

Осыған байланысты «Қазгидромет» тұрғындарды, әсіресе жүргізушілерді жол қозғалысы кезінде барынша сақ болуға, алыс жолға шықпауға, ауа райы жағдайын ескеруге шақырады.