Айта кетсек, алдағы жұмада АҚШ пен Ресей Федерациясы басшылары телефонмен сөйлесіп, Украинадағы атысты тоқтату мәселесін талқылайтыны жоспарланып отыр. Осыны негізге алған Қазақстан қаржыгерлері қауымдастығы апта соңына қарай теңге мен ресейлік рубльдің тағы да нығая түсетінін болжайды, деп хабарлайды Dalanews.kz.
Осы аптада сейсенбідегі қор биржасындағы сауда-саттық қорытындысы бойынша ұлттық валютаға шаққанда 1 АҚШ долларының құны 5,82 теңгеге тағы арзандап, 488,44 теңгені құрады. Сауда-саттықтың жоғары көлемі (270,1 млн доллар) тіркелді.
"Ұлттық валюта бағамының мұндай сипаты базалық мөлшерлеменің жоғарылауы, Ұлттық Банктің операциялары және квазимемлекеттік сектор субъектілері сатуы аясында шетел валютасының тұрақты ұсынысы, сондай-ақ жылдың бірінші тоқсанында сауда балансының профицитінің жақсаруымен айқындалуы мүмкін. Сыртқы фактор тарапынан рубльдің қатты нығаюы және бір мезгілде доллар индексіне қатысты жүргізіліп жатқан түзетулер жергілікті сентиментке жағымды әсер етуі ықтимал. Бұл тұрғыда Украинадағы әскери қақтығысты реттеуге қарай жасалған алғашқы қадамдар алдағы күндері рубль мен теңгеге айтарлықтай оң әсер етуі мүмкін екенін атап өтеміз. Айта кетсек, Джиддадағы келіссөздердің қорытындысы бойынша Украина АҚШ-тың атысты тоқтатудың 30 күндік режимі туралы ұсынысына келіскен. Бүгін америкалық және ресейлік дипломаттар арасында келіссөздер болады деп күтілуде, ал жұмада Украинадағы атысты доғару мәселесін АҚШ пен Ресей басшылары телефон арқылы талқыламақ", делінген Қазақстан қаржыгерлері қауымдастығы хабарламасында.
Бұған дейін сайтымызда теңгенің рубльге еруін доғарғанын жазғанбыз.
