Түркістан облысында Беларусьтен келген туристерден 200 мың теңге талап етті деген күдікке ілінген полиция қызметкерлеріне қылмыстық іс қозғалды. Бұл туралы Мәжіліс дәлізінде журналистерге ішкі істер министрінің орынбасары Игорь Лепеха мәлімдеді, – деп хабарлайды Dalanews.kz.

Мән-жай

Оқиға Шымкент–Самара тасжолының бойында болған еді. Беларусьтен келіп саяхаттап жүрген блогерлер әлеуметтік желіде жариялаған видеосында жергілікті полицейлердің ешбір негізсіз 200 мың теңге (шамамен 400 доллар) ақша талап еткенін айтты.

Туристердің сөзіне қарағанда, полицейлер оларды «қазақстандық техникалық байқаудан өтпедіңдер, камераға түстіңдер» деп айыптаған, бірақ нақты айғақ пен дәлел көрсетпеген.

"Барлық құжаттарымыз дұрыс, ешқандай ереже бұзбадық. Бірақ олар 200 мың теңге төлеуді талап етті. Бізге шекараға дейін ешкім тимейді деп сендірді. Бас тартуға мүмкіндік қалмады, амалсыз төледік", – дейді беларусьтік туристер.

Ішкі істер министрлігінің реакциясы

Алғашында Түркістан облыстық Полиция департаменті бұл оқиғаға қатысты шағым түспегенін мәлімдеген болатын.

Дегенмен әлеуметтік желіде дау тудырған бұл жайт бойынша қылмыстық іс қозғалып, күдікке ілінген қызметкерлер жұмыстан босатылған. Сонымен қатар, осы полицейлердің тікелей басшыларына қатысты қызметтік тексеріс басталды.