TikTok платформасы “Отбасылық параметрлер” бөлімінде жаңа құралдарды іске қосты, деп хабарлайды Dalanews.kz.
Енді ата-аналар балалардың TikTok-ты пайдаланатын уақытын белгіленген мерзімге, әсіресе түнгі уақытта шектеуге мүмкіндік алады.
“Платформа жастар үшін қауіпсіз цифрлық орта қалыптастыруға және ата-аналарға балаларының қосымшадағы белсенділігін бақылауға көмектесуге бағытталған жаңа функцияларды іске қосатынын мәлімдеді. Атап айтқанда, TikTok “Отбасылық параметрлер” бөлімінде ата-аналарға балалардың TikTok-қа кіру уақытын белгіленген мерзімде шектеуге мүмкіндік беретін жаңа қызметті ұсынды”, – делінген Мәдениет және ақпарат министрлігінің баспасөз қызметі таратқан хабарламада.
Енді ата-аналар TikTok-қа кіру уақытын шектеп қана қоймай, балалардың кімге жазылғанын және қандай аккаунттарды бұғаттағанын да бақылай алады.
Жаңа мүмкіндіктер:
“Белсенді емес уақыт”– TikTok-қа қолжетімділікті белгілі бір уақытқа, мысалы, оқу немесе ұйқы кезінде бұғаттау;
Қайталанатын кесте – тұрақты түрде цифрлық үзіліс жасауға арналған кестені орнату;
Шектеуді өзгерту – бала сұраныс жіберген жағдайда, бұрын бұғатталған уақытқа рұқсат беру мүмкіндігі.
Алдағы айларда TikTok-та жасөспірімдер ата-аналарына платформаның ережелерін бұзуы мүмкін контент туралы хабарлай алатын жаңа функция іске қосылады. Бұл мүмкіндік ата-ана бақылауы қосылмаған жағдайда да қолжетімді болмақ.
