Жиында «Nur Otan» партиясы Түркістан облыстық филиалы төрағасының бірінші орынбасары, фракция жетекшісі Бейсен Тәжібаев партияның аймақтық филиалы Саяси кеңесінің 2019-2020 жылдары атқарылған жұмыстары туралы есеп беріп, алдағы жоспарларға тоқталды.
Оның айтуынша, Түркістан облысында «Nur Otan» партиясының 80 мыңнан астам мүшесі, 244 бастауыш партия ұйымы бар. Өңірде партиялық жобалар жоғары деңгейде жүзеге асырылып келеді. Партияның қоғамдық қабылдау бөлмелеріне 2019 жылы 9 мыңнан астам арыз-шағым келіп түссе, олардың 49%-ы оңтайлы шешілген. 2020 жылы 27 мыңнан астам өтініш түсіп, алдыңғы жылмен салыстырғанда 3 есеге артқан. Бұл – халықтың партияға деген сенімін көрсетеді. Өтініштерді қарау нәтижесінде 60%-ы оңтайлы шешілген. Партия филиалы арыз-шағымды дер кезінде қадағалау, қоғаммен байланыс орнатуды жетілдіру, ақпараттық және насихаттық жұмыс көрсеткіші бойынша республикада алдыңғы қатарда келеді.
«2020 жылы елімізде короновирус пандемиясына байланысты төтенше жағдай жарияланды. «Біз біргеміз» акциясы аясында қиын жағдайда қалған 43540 отбасына азық-түлік себеттері берілді. Бұл бойынша Түркістан облысы республикада екінші орынға шықты. Акцияға облыс кәсіпкерлері, партия мүшелері, облыстық, аудандық мәслихат депутаттарының қосқан үлесі зор. Елбасы, партия Төрағасының тапсырмасымен құрылған «Біргеміз» республикалық қоры арқылы облыстың 38907 отбасына 50000 теңгеден берілді. Мақтааралда аталған қордың көмегімен 32 үй тұрғындарға тапсырылды», – деген Бейсен Дәулетұлы праймеризге қатысу көрсеткіші бойынша өңір республикада бірінші орынға шыққанын, «Nur Otan» партиясының облыстық фракциясының құрамы 60%-ға жаңарғанын, орташа жасы – 47, яғни 4 жылға жасарғанын мәлімдеді.
Бұл жұмыстарды атқаруда Партия Төрағасы Нұрсұлтан Назарбаевтың партия жұмысын жандандыру жөніндегі «Сенім. Диалог. Болашаққа нық қадам» – «Nur Otan» партиясының 7 серпіні» бағдарламасы мен Ел Президенті Қасым-Жомарт Тоқаевтың «Халық үніне құлақ асатын мемлекет» тұжырымдамасы негізге алынған.
Конференцияда облыстық бақылау-тексеру комиссиясының төрағасы А.Тасыбаев пен облыстық мәслихат депутаты Бекарыс Шойбеков филиал жұмысының жанданғанын айтты. Түркістан облыстық ардагерлер кеңесінің төрағасы, саяси кеңес мүшесі Жеңісбек Мәуленқұлов сайлауалды бағдарламаны орындау барысында Түркістан өңірінде ауқымды жұмыс қолға алынғанын, Түркістан шаһарындағы игі өзгерістерге Елбасы жоғары бағасын бергенін жеткізді.
Конференцияны қортындылаған облыс әкімі, партияның облыстық филиалының төрағасы Өмірзақ Шөкеев партияның облыстық филиалының соңғы екі жылда атқарған жұмыстарын оң бағалап, облыстық, аудандық және қалалық филиал төрағаларына бірқатар тапсырма берді.
– «Nur Otan» – нақты істер партиясы. Еліміз бойынша жетекші партияның ықпалымен тұрғындардың талап-тілектері назарға алынып, өзекті мәселелер шешімін тапты. «Өзгерістер жолы: Әр азаматқа лайықты өмір!» атты «Nur Otan» партиясының Сайлауалды бағдарламасын іске асыру жөніндегі Жол картасының орындалуын қамтамасыз етуді тапсырамын. Бұл – Түркістан облысының даму бағдарламасы. Сондықтан индикаторлар толық орындалуы тиіс.
Сайлауалды бағдарламаның іске асырылуын бақылау мақсатында құрылған Қоғамдық кеңестердің жұмысы белсенді жүргізілсін. Тұрғындардың өзекті мәселелерін шешу мақсатында көшпелі қабылдаулар, партия филиалдары басшылығының, фракция мүшелерінің, мемлекеттік орган басшыларының қоғамдық қабылдауларын жүйелі өткізуді тапсырамын. Қазір пандемия әлем елдеріне, оның ішінде Қазақстанға да оңай тиіп жатқан жоқ. Бірақ біз еліміздегі жетекші саяси күш ретінде мемлекеттің дамуына үлес қосуымыз керек. Бұл ретте баршаңызға жауапкершілік жүктеліп отыр. Сайлауалды бағдарламаны орындау – біздің міндетіміз. Сондықтан жол картасын жанашырлықпен атқаруды талап етемін, – деді Ө.Шөкеев.
Конференция қортындысы бойынша «Nur Otan» партиясы Түркістан облыстық филиалы Саяси кеңесінің жаңа құрамы сайланып, қаулы қабылданды.
