Елордада есірткі заттарын жарнамалайтын граффити суреттерді бояуға арналған кезекті акция өтті,- деп хабарлайды Dalanews.kz

Іс-шара Сарайшық көшесінде ұйымдастырылды. Оған қалалық полиция департаментінің есірткі қылмыстарына қарсы іс-қимыл басқармасының қызметкерлері, «Астана жастары» жастар ресурстық орталығының еріктілері, танымал спортшылар мен блогерлер қатысты.

Олар есірткі сайттарының мекенжайлары көрсетілген белгілерді бояп, олардың орнына «Нашақорлыққа жол жоқ!» деген жазуы бар граффити салды.

Шараны Есіл ауданы әкімінің аппараты, Астана қаласы ПД есірткі қылмысына қарсы іс-қимыл басқармасы және аудандық полиция басқармасы бірлесіп ұйымдастырды.

Астана қаласы кикбоксинг федерациясының вице-президенті, №7 БЖСМ аға жаттықтырушысы, есірткі қылмысына қарсы іс-қимыл кеңесінің мүшесі Ернар Омаров өз пікірін білдірді.

«Мен өмір бойы осы қалада тұрып келемін және оның әрбір тұрғынының тағдырына алаңдаймын. Сондықтан осындамын. Біз есірткі жарнамалаған суреттерді бояп жатырмыз. Жаттығуларда шәкірттеріме ненің жақсы, ненің жаман екенін түсіндіремін. Есірткі – зұлымдық. Онымен сөзбен де, іспен де күресу керек», – деді ол.

Осы пікірді елордалық автомотоспорт федерациясының президенті, есірткі қылмысына қарсы іс-қимыл кеңесінің мүшесі Анатолий Бондарь да қолдайды.

«Біздің міндетіміз – наркограффитиді жою үшін барынша күш салу. Біз құқық қорғау органдарымен он жылдан бері бірлесіп жұмыс істеп келеміз. Себебі жастардың тағдырына алаңдаймыз және олардың есірткіге емес, спортқа бет бұрғанын қалаймыз», – деді ол.

NEET санатындағы жастармен жұмыс істеу бөлімінің басшысы Сұлтан Өмірғалиевтің айтуынша, бұл шара «Заң және тәртіп» баяндау форматы аясында өтіп жатыр.

«Біз өскелең ұрпаққа есірткінің зиянын алдын ала түсіндіруіміз керек. Оның орнына спорт, кітап оқу, саяхат жасау сияқты маңызды істер барын көрсеткеніміз жөн», – деп қосты ол.