Алматыда жаңа жылдық безендіруге шамамен 800 миллион теңге жұмсалады. Мегаполис әуежайдан бастап орталық алаңдарға дейін безендірілмек. Сондай-ақ, мерекелік бағдарламалар жоспарланған, деп хабарлайды Dalanews.kz.
Әкімдіктің мәліметінше, Алматы аумағында 300-ге жуық ертегі кейіпкерлері мен мерекелік белгілерге ұқсас шағын сәулет нысандары орнатылады, оның ішінде 120-сы өткен жылғы жөндеуден өткен конструкциялар. Биыл мерекелік шараларда бұрын қалпына келтірілген инсталляциялар мен мәдени мекемелердің қатысуына басымдық берілген. Бұл қадам кең ауқымды мерекені оңтайлы шығындармен өткізуге мүмкіндік береді.
Қаладағы негізгі көшелер мен даңғылдарда жарық қосылған инсталляциялар орнатылады. Магистральдар бойына 1500 жарық элементі қойылады, олардың 350-і өткен жылы қалпына келтірілген. Сондай-ақ, 21 маңызды ғимараттың қасбеттері жарықтандырылады, ал “Көктөбе” телемұнарасында мультимедиялық бейнешоу көрсетіледі.
Республика Сарайы алдындағы Абай алаңына биіктігі 22 метр болатын басты шырша орнатылады. Ол ұзындығы 6 шақырым гирляндамен, сәндік шарлармен және эко-ойыншықтармен безендіріледі. Қалада жалпы 80-нен астам шырша қойылады. Олар Тұңғыш Президент саябағында, Республика алаңында, “Алматы Аренада”, “Халық Арена” мұз сарайында және басқа да орындарда бой көтереді.
Басты шыршаны жағу рәсімі 20 желтоқсанда өтеді. Сол күні Абай алаңында қазақстандық жұлдыздардың қатысуымен мерекелік концерт ұйымдастырылады. Ал Астана алаңында жәрмеңке мен Аяз атаның киіз үйі қойылады. Алматы Арбаты Карнаби-стрит стилінде безендіріліп, күнделікті жәрмеңкелер мен музыкалық қойылымдар өтеді.
Алматы циркі “Қар ханшайымы” цирктік шоуын, Мемлекеттік қуыршақ театры “Сиқырлы айна” қойылымын ұсынады. Бағдарламаға балаларға арналған интерактивті ойындар, жаңа жылдық шерулер және көрмелер кіреді. Олар қаланың сегіз ауданында өтеді.
Жаңа жылдық шаралар 31 желтоқсанда ҚБТУ ғимаратының алдында қазақстандық танымал орындаушылардың қатысуымен өтетін концерт пен мерекелік шоумен аяқталады.
