Ýkraina armiiasy arnaiy drondardyń kómegimen Reseidiń birqatar áskeri aerodromdaryn nysanaǵa alyp, iri operatsiia ótkizdi. Prezident Vladimir Zelenskii bul sharany “Órmek” (Paýtina) dep atap, ony Reseidiń Ýkrainaǵa basyp kirýinen beri oryndalǵan eń batyl ári aýqymdy áskeri áreket dep málimdedi, dep habarlaidy Dalanews.kz.
“Bul – Ýkrainanyń óz kúshimen ǵana atqarǵan strategiialyq operatsiiasy. Ony josparlap, iske asyrý úshin bir jarym jyldan astam ýaqyt jumsaldy. Sharany uiymdastyrǵan adamdarymyzdy Resei aýmaǵynan der kezinde ári esh qiyndyqsyz alyp shyqtyq. Bul operatsiia Ýkrainanyń ulttyq qaýipsizdigi úshin óte mańyzdy qadam boldy”, – dep atap ótti Zelenskii.
Ýkraina Qaýipsizdik qyzmetiniń habarlaýynsha, shabýyldyń nátijesinde Reseidiń 40-tan astam áskeri ushaǵy búlingen. Olardyń ishinde strategiialyq aviatsiianyń mańyzdy elementteri sanalatyn A-50, Tý-95 jáne Tý-22M3 ushaqtary bar.
Jalpy operatsiia barysynda Ýkraina jaǵy 117 dron paidalanǵan. Zelenskiidiń aitýynsha, bul shabýyldyń nátijesinde Reseidiń qurlyqaralyq qanatty zymyrandardy tasymaldaityn strategiialyq aviatsiiasynyń shamamen úshten biri (34%) zaqymdandy. Aldyn ala boljam boiynsha, keltirilgen materialdyq shyǵyn 2 milliard dollardan asady.
Reseidiń Qorǵanys ministrligi bul shabýyldardyń oryn alǵanyn moiyndap otyr. Ministrlik habarlamasynda “birneshe aviatsiialyq tehnika janyp ketkeni” aityldy. Sondai-aq, bul áreketterdi “Kiev rejimi uiymdastyrǵan terrorlyq aktiler” dep baǵalady.
Resmi aqparat boiynsha, drondarmen jasalǵan shabýyl Reseidiń bes aimaǵynda ornalasqan áskeri aerodromdardy qamtyǵan:
Mýrmansk,
Irkýtsk,
Ivanovo,
Riazan,
Amýr oblysy.
Qazirgi ýaqytta Resei, Ýkraina jáne AQSh arasynda soǵysty toqtatý boiynsha kelissózder jalǵasyp jatyr. AQSh tarapy eger Máskeý urys áreketterin toqtatýǵa naqty niet bildirmese, kelissózderden shyǵatynyn eskertken. Óz kezeginde Resei prezidenti Vladimir Pýtin NATO-nyń shyǵysqa qarai odan ári keńeimeitini jóninde Batys elderinen resmi ári jazbasha kepildik talap etýde.
