Qazaqstanda balalardy birinshi synypqa qabyldaý jalǵasýda. Jańa oqý jylynda 380 myńnan astam bala mektep tabaldyryǵyn attaidy dep kútilýde. Búginde boljanǵan bala sanynyń 320 myńǵa jýyǵy, iaǵni shamamen 84%-y mektepterge qabyldandy, dep habarlaidy dalanews.kz.
Qabyldanǵan balalardyń 296 myńǵa jýyǵy memlekettik, 23 myńǵa jýyǵy jekemenshik mektepterde bilim alady. Qalalyq mektepterge 191 myńǵa jýyq, aýyldyq mektepterge 128 myńǵa jýyq bala qabyldandy. Sondai-aq bilim berý uiymdaryna erekshe bilim berý qajettilikteri bar 4 myńǵa jýyq bala qabyldandy.
Bolashaq birinshi synyp oqýshylarynyń 71%-dan astamy qazaq tilinde, 26%-dan astamy orys tilinde, taǵy 2,5%-ǵa jýyǵy basqa tilderde bilim beretin synyptardy tańdaǵan. Sonymen qatar ózge ult ókilderiniń 2 myńnan astam balasy qazaq tilinde bilim beretin synyptarǵa qabyldandy. Bul ata-analardyń balalaryn qazaq tilinde oqytýǵa degen qyzyǵýshylyǵynyń artyp kele jatqanyn kórsetedi.
Qujattardy qabyldaý Oqý-aǵartý ministrligi men Jasandy intellekt jáne tsifrlyq damý ministrliginiń birlesken buiryǵy negizinde pilottyq joba aiasynda júrgizilýde. Ótinishter 2026 jylǵy 27 mamyr men 31 tamyz aralyǵynda bekitilgen kestege sáikes kezeń-kezeńimen qabyldanady.
Ótinishterdiń 84%-ǵa jýyǵyn ata-analar elektrondyq formatta bergen. Qujattardy eGov.kz elektrondyq úkimet portaly nemese eGov Mobile mobildi qosymshasy arqyly, sondai-aq tańdalǵan mektepke tikelei tapsyrýǵa bolady.
Birinshi synyp oqýshylarynyń eń kóp sany Túrkistan oblysynda - 50 myńnan astam, Almaty oblysynda - 35 myńnan astam, Astanada - 33 myń, Almatyda - 31 myńnan astam jáne Shymkentte - 29 myńnan astam bolady dep kútilýde. Bul osy óńirlerdegi halyq sanynyń kóptigimen jáne týý deńgeiiniń joǵary bolýymen bailanysty.
Eske salaiyq, buǵan deiin Densaýlyq saqtaý ministrligi mektep sómkesin qalai tańdaý keregin túsindirgen bolatyn.
