QR UQK burynǵy tóraǵasy Nartai Dútbaevqa qatysty sot úkimi shyqty. Bul týraly QR Áskeri sotynyń saitynda habarlandy.
Aqmola garnizonynyń Áskeri soty 2017 jylǵy 24 tamyzda Nartai Dútbaevqa jáne istiń basqa figýranttaryna qatysty qylmystyq is boiynsha shyǵarylǵan úkimin jariialady. Sot otyrysy jabyq jaǵdaida ótti.
«Sottyń úkimine sáikes N.N.Dútbaev memleketti qupiialardy jariia etkeni úshin QR QK 172 babyna sáikes kináli dep tanylyp, qyzmettik mindetin asyra paidalanǵany úshin 7 jyl 6 aiǵa bas bostandyǵynan aiyrý jazasy taǵaiyndaldy. N.N.Dútbaevty «general-leitenant» áskeri ataǵynan jáne memlekettik marapattarynan aiyrý jóninde usynys engizildi», - dep jazylǵan QR Joǵarǵy soty taratqan habarlamada.
Is boiynsha taǵy bir figýrant R.J. Muratovtyń osyndai qylmys (QR QK 172, 451-baptary) jasaǵany dáleldenip, 5 jylǵa bas bostandyǵynan aiyryldy, ol ómir boiyna memlekettik qyzmette isteý quqyǵynan aiyryldy.
N.B.Hasen memlekettik qupiialardy jariia etkeni (QR QK 172-baby) jáne qyzmettik ókilettigin asyra paidalanǵany (QR QK 308-baby) úshin aiypty dep tanylyp, ómir boiyna memlekettik qyzmette isteý quqyǵynan aiyryla otyryp, 5 jylǵa sottaldy. Onyń memlekettik nagradalaryn qaitarý týraly usynys engizildi.
E.S.Nurtaev memlekettik qupiialardy jariia etýge kómektesýde kináli dep tanylyp, 3 jyl 6 aiǵa bas bostandyǵynan aiyryldy, ol da ómir boiyna memlekettik qyzmette jumys istei almaidy. Úkim zańdy kúshine enbedi.
Áskeri sottyń baspasóz qyzmeti Ulttyq qaýipsizdik komitetiniń burynǵy basshysyna qatysty is Aqmola garnizonynyń áskeri sotynda qaralyp jatqanyn habarlady. Eger sottalýshylar apelliatsiialyq shaǵym túsirse, Joǵary sot isti jalǵastyrýy múmkin.
Nartai Dútbaev 2001-2006 jyldary UQK tóraǵasy qyzmetin atqarǵan. Ol ótken jyldyń sońynda "memlekettik qupiiany jariia etti" degen kúdikpen ustalǵan bolatyn. Dútbaevtyń naqty qandai qupiiany kimge jáne qashan jariia etkeni beimálim. Buǵan deiingi tergeý jáne sot otyrystarynyń bári derliktei qupiia jaǵdaida ótti.
Buǵan deiin UQK-ni eki ret basqarǵan Álnur Musaev "memleketke opasyzdyq jasady", "Áskeri tóńkeris jasamaq boldy" degen aiyptarmen syrttai sottalǵan bolatyn. Ol qazir shetelde boi tasalap júr. Álnur Musaev pen Nartai Dútbaevtyń esimderi UQK saittarynan alynyp tastalǵan.
