Alqaly otyrysta Memleket basshysy Ulttyq quryltaıdyń máni men mazmunyna toqtaldy.
– Ulttyq Quryltaıdyń jumysyn uıymdastyrý máselesine toqtalsam. Onyń quramynda 117 adam bar. Quryltaıǵa barlyq oblystyń, san túrli salanyń, ár býynnyń ókilderi qatysyp otyr. Biz kópti kórgen el aǵalarynyń aqyl-keńesine júginemiz. Belsendi azamattyq ustanymy bar orta býynnyń tájirıbesin eskeremiz. Jańasha oılaıtyn jastardyń tyń ıdeıalaryn qoldaımyz, – dedi Prezıdent. Budan keıin Qasym-Jomart Toqaev qazaq tarıhynda quryltaı ótkizýdiń mańyzy jaıynda da áńgimeledi.
– Ulttyq quryltaıdyń Ulytaýda bastalǵany durys boldy. Kıeli ólkemiz Jańa Qazaqstandy qurý jolyndaǵy birliktiń sımvolyna aınaldy. Osy oraıda, men taǵy bir mańyzdy bastama kótergim keledi. Bul jerde barlyq rýlardyń tańbasy tasqa jazylǵan. Sol arqyly babalarymyz ult birligin kórsetken. Qanysh Sátbaev «Elimizdiń tý tikken jeri – Tańbaly tas» degen. Ókinishke qaraı, qasterli jazýlar keıin ábden búlindi. El azamattary Ulytaýǵa eskertkish qoıyp, tastaǵy tańbalardy jańǵyrtty. Biraq, bul jetkiliksiz dep oılaımyn.
Munda qazaqtyń birligin áıgileıtin sáýletti nysan turýy kerek. Men Áýlıetaýdyń eteginde Memlekettik rámizder alańyn ashýdy tapsyramyn. Qasıetti óńirde kók baıraǵymyz asqaqtap turýǵa tıis. Sol arqyly urpaqtar sabaqtastyǵy jalǵasyp jatqanyn kórsetemiz. Tamyry tereń memlekettigimizdiń jańa dáýiri bastalǵanyn bildiremiz, – dedi.
