Astanada «Uly dala joryǵy» at marafon-báigesi týraly derekti filmniń tusaýkeser kórsetilimi ótti. Bul marafon 2022 jyldan bastap jyl saiyn «AMANAT» partiiasynyń, Týrizm jáne sport ministrliginiń qoldaýymen ótkizilip keledi. Uiymdastyrýshylar – QR Ulttyq sport qaýymdastyǵy men onyń quramyna kiretin «JORYQ» at sporty federatsiiasy.
Filmde 2023 jyly ótken «Uly dala joryǵy» marafony týraly baiandalady. Osy joryqqa qatysýshylar Astanadan Túrkistanǵa deiin 1300 shaqyrym jol júrip ótken edi. Marafon 14 kezeńge bólinip, oǵan elimizdiń 19 óńirinen bir komandadan qatysty.
Ekinshi marafonnyń qorytyndysy boiynsha 1300 shaqyrym joldy 93 saǵat 47 minýt 43 sekýndta júrip ótken Jetisý oblysynyń komandasy absoliýtti chempion atandy. Sonymen qatar, Mańǵystaý oblysynyń shabandozy Maǵjan Abdoluly 50 shaqyrymdy 1 saǵat 33 minýtta júrip ótip, álemdik rekord ornatty.
«AMANAT» partiiasynyń Atqarýshy hatshysy Dáýlet Káribek teńdesi joq «Uly dala joryǵy» marafon-báigesi az ýaqyttyń ishinde halqymyzdyń súiikti jarysyna, kózaiymyna ainalǵanyn atap ótti.
«Memleket basshysynyń qoldaýymen bastalǵan «Uly dala joryǵy» báigesi ulttyq sporttyń damýyna ǵana emes, ulttyq bolmysymyz ben tarihymyzdy tanýǵa, ulttyq rýhtyń oianýyna zor qozǵaý salyp otyr. Báige-marafonǵa «AMANAT» partiiasynyń tóraǵasy Erlan Jaqanuly Qoshanov ta únemi qoldaý kórsetip keledi. Biz de árdaiym osy igi sharanyń basy-qasynda bola beremiz. «Uly dala joryǵynan» keiin qoǵamda, ásirese jastardyń arasynda jylqyǵa, ulttyq sportqa degen qyzyǵýshylyqtyń eselep artqanyn kórip otyrmyz. Qazirgi ýaqytta jylqy ulttyq brendimizge ainaldy deýge bolady. Sondyqtan, búgingi derekti filmdi bolashaqta jylqy týraly túsiriletin óner týyndylarynyń, kórkem filmderdiń izashary dep bilemin», - dedi Dáýlet Káribek.
Kinokartinada shabandozdardyń jarysqa daiyndyǵy, olardyń qiyndyqtardy qalai jeńgeni jáne jeńiske degen umtylysy kórsetiledi. Film qazaq halqynyń ótken kóshpeli ómir salty men qazirgi Qazaqstannyń keleshek kókjiegin biriktire otyryp, ulttyq rýhty jańǵyrtady.
Filmde at marafonyna qatysýshylar sapar barysynda basynan ótken oqiǵalary týraly áńgimelep, shynaiy emotsiiasymen bólisedi. Olar Uly dala tósin kóktei ótip, kóshpendilerdiń shynaiy álemine enýge múmkindik alǵandaryn aitady.
«Biz osy biregei jobany qatarynan úshinshi jyl ótkizgeli otyrmyz. «Uly dala joryǵy» kúzde elimizde ótetin 5-shi Dúniejúzilik kóshpendiler oiyndarynyń baǵdarlamasyna engizildi. Iaǵni, joryq halyqaralyq deńgeige kóterildi. Osy jobanyń arqasynda elimizde ulttyq sport jáne at sporty óneri dami túsedi dep úmittenemiz», - dedi QR Ulttyq sport qaýymdastyǵynyń prezidenti Islambek Saljanov.
Derekti filmniń tusaýkeserine kelgen qonaqtardyń qatarynda ótken jyly osy marafon-báigege qatysýshylar, sport salasynyń ókilderi, Parlament depýtattary, qoǵam qairatkerleri, sheteldik diplomatiialyq korpýs ókilderi jáne t.b. boldy. Aita keteiik, osy jeksenbide Pavlodar-Astana baǵyty boiynsha úshinshi «Uly dala joryǵy» marafon-báigesi bastalady.
«Uly dala joryǵy» derekti filmin «Black&White» kompaniiasy túsirdi. Jobanyń seriktesteri – «Samuryq-Qazyna» AQ jáne «Sport Qory» sportty qoldaý qory.
Eske sala keteiik, Respýblikalyq «JORYQ» federatsiiasy Qazaqstan Respýblikasy Ulttyq sport qaýymdastyǵynyń quramyna kiredi. Qaýymdastyq quramynda budan ózge báige, kókpar, teńge ilý, aýdaryspaq, jamby atý, qusbegilik, sadaq atý, asyq atý jáne t.b. federatsiialar bar. QR Ulttyq sport qaýymdastyǵyn belgili kásipker, metsenat, «Altyn Qyran Foundation» Qoǵamdyq qory Qamqorshylyq keńesiniń tóraǵasy Islambek Saljanov basqarady.
