QR Premer-Ministri Oljas Bektenov «Aýylda densaýlyq saqtaýdy jańǵyrtý» ulttyq jobasy aiasynda meditsinalyq mekemelerdi salý jáne jańǵyrtý úshin Úkimet rezervinen 39,9 mlrd teńge bólý týraly qaýlyǵa qol qoidy. Sheshim 27 aqpandaǵy Úkimet otyrysynyń hattamasyn oryndaý sheńberinde qabyldandy, - dep habarlaidy Dalanews.kz.
Ulttyq joba aýyl turǵyndaryna meditsinalyq kómek kórsetý deńgeiin arttyrý maqsatynda Memleket basshysynyń 2022 jylǵy 1 qyrkúiektegi «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda aitylǵan tapsyrmalaryn oryndaý aiasynda iske asyrylýda.
Onyń sheńberinde 655 meditsinalyq-sanitariialyq alǵashqy kómek (MSAK) nysandaryn salý jáne ortalyq aýdandyq aýrýhanalardy jańǵyrtý kózdelgen.
Jobalar jobalaý-smetalyq qujattamanyń (JSQ) ázirligine qarai óńirlerdiń ákimdikterinen berilgen ótinimderge sáikes qarjylandyrylady. Osyǵan bailanysty Úkimet rezervinen 39 mlrd 987 mln teńgeden astam qarajat aýyldyq eldi mekenderde JSQ daiyn 297 alǵashqy meditsinalyq kómek nysanyn salýǵa baǵyttalady. Olardyń ishinde meditsinalyq pýnktter, feldsherlik-akýsherlik pýnktter jáne dárigerlik ambýlatoriialar bar.
Sonymen qatar bólingen qarajattyń bir bóligi:
- Arqalyq óńirlik aýrýhanasy perzenthanasynyń ǵimaratyndaǵy kúrdeli jóndeý jumystaryn aiaqtaýǵa;
- Stepnogorsk kópsalaly qalalyq aýrýhanasynyń eki blogyn kúrdeli jóndeýge;
- Atbasar kópsalaly aýdanaralyq aýrýhanasynyń bas ǵimaratyn kúrdeli jóndeýge;
- Balqash qalasynyń Ortalyq aýrýhanasyn kúrdeli jóndeý jumystaryn bastaýǵa;
- Balqash qalasynyń Kópsalaly aýrýhanasynyń angiografiialyq ota jasaityn bas korpýsyna qosymsha ǵimarat salýǵa jáne angiografiialyq qondyrǵyny ornalastyrýǵa;
- Shieli kópsalaly ortalyq aýdandyq aýrýhanasynyń ǵimaratyna qosymsha blokty japsarlas sala otyryp, kúrdeli jóndeýge jáne sol jerde 30 tósek-orynǵa arnalǵan juqpaly aýrýlar bólimshesiniń qurylysyna aýdarylady.
