Túimebaev: "Turǵyn úi baǵasyn arzandatý qajet"
Ońtústik Qazaqstan oblysynyń ákimi Janseiit Túimebaevtyń tóraǵalyǵymen oblys ákimdiginde aimaq kólemindegi qurylys jáne jobalaý jumystarynyń barysy boiynsha májilis ótti. Otyrysqa QR Parlamentiniń Senatyna depýtat bolyp óńirimizden jaqynda sailanǵan Álimjan Qurtaev qatysty.
Saladaǵy jumystardyń atqarylý barysyn baiandaǵan oblystyq qurylys basqarmasynyń basshysy Quttybek Jamashevtyń málimetinshe, 2017 jyly óńirde qurylysy josparlanǵan 196 nysannyń 121-in paidalanýǵa tapsyrý kózdelse, qalǵany keler jylǵa ótpeli eken. El igiligine beriletin nysandardyń 29-y bilim berý nysany bolsa, 34-i densaýlyq saqtaý, 1-ýi áleýmettik qamtý, 3-ýi mádeniet salasyna bailanysty, al 42 nysan 61 turǵyn úi ǵimarattaryna jatady. Sonymen birge, 8 obekti injenerlik infraqurylymǵa, 1 nysan monoqalaǵa, 1-ýi aýyl sharýashylyǵy, 1-ýi abattandyrý salasyna qatysty jáne 1-ýi qorshaǵan ortany qorǵaý nysandaryna jatatyn ǵimarattar bolyp tabylady. Al jyl basynan beri osy 121 nysannyń 15-i qoldanysqa berilgen. Olardyń 5 nysany bilim berý obektisi, 4-ýi densaýlyq saqtaý, 1-ýi áleýmettik qamtý, 1-ýi turǵyn úi bolsa, 1-ýi qorshaǵan ortany qorǵaý jáne 3-ýi injenerlik-kommýnikatsiialyq nysandar.
Oblys azamattaryn turǵyn úimen qamtamasyz etý boiynsha arnaiy toqtalǵan basqarma basshysy biyl 10879 páterli 226 turǵyn úidiń (aýdany 737,6 myń sh.m.) qurylysy júrip jatsa, jyl sońyna deiin sonyń 6375 páterden turatyn 115 úii (aýdany 388,7 myń sh.m.) kezegin kútken qojaiyndaryna tapsyrylmaq.
Keltirilgen maǵlumattardy muqiiat tyńdaǵan oblys ákimi Shymkenttegi kóp qabatty úiler qurylysyn kóbeitý qajettigine toqtaldy. Ol úshin tiisti qarjy kózderin kóptep tartý kerektigin aitqan Janseiit Qanseiituly baspanalardy salarda sapasy men sáýletine, úi ishiniń jobasyna mán berýdi tapsyrdy.
«Turǵyn úilerdi salýda otbasyn qurmaǵan boidaq azamattar úshin bir, bir jarym bólmeli páterlerdi kóbeitý qajet. Sonymen birge, otbasylyq jáne stýdenttik jataqhanalardyń sanyn arttyryp, stýdentter úshin arnaiy qalashyq boi kóterýi kerek. Al úi qurylysynda jańa tásilderdi qoldanyp, ózimizde óndiriletin zamanaýi, sapaly materialdardy kádege jaratýdy bastańyzdar. Eń bastysy, turǵyn úilerdiń baǵasyn halyqtyń qaltasyna qonymdy bolatyndai eseptep, ony arzandatý jaǵyn qarastyryńyzdar», - dedi J.Túimebaev.
Sondai-aq, jiynda ákim áleýmettik nysandarǵa jatatyn mektep, balabaqsha, meditsinalyq mekemelerdi salarda daiyndalatyn jobalyq smetalyq qujattardy (JSQ) ázirleýde qujattardyń uzaq merzimge sozylatynyn synǵa aldy. Bul rette, arnaiy bekitilgen standarttar negizinde jumys isteýdi qatań tapsyrǵan óńir basshysy halyqqa tezirek qolaily jaǵdai jasaý máselesin esten shyǵarmaýdy eskertti.
