Túrkistan oblysynda azamattyq nekedegi áielin kúshtep jyndyhanaǵa jatqyzǵan er adam 9 jylǵa sottaldy, dep habarlaidy Dalanews.kz.
Tergeý dereginshe, otbasylyq janjaldan keiin ol eki tanysymen birge áieldiń qol-aiaǵyn skotchpen bailap, erkinen tys Shymkenttegi meditsinalyq mekemege alyp barǵan.
Tintý barysynda kúdiktiniń úiinen jaýyngerlik oq-dáriler tabyldy. Oǵan kómektesken eki sybailasy 8 jylǵa bas bostandyǵynan aiyryldy. Sonymen qatar sot jábirlenýshige moraldyq ziian úshin jalpy 11 million teńge kóleminde ótemaqy tóleýdi mindettedi. Qazirgi tańda úkim zańdy kúshine engen joq.
Aita keteiik, Túrkistan oblysy boiynsha Adam quqyqtary jónindegi ýákildiń ókili áielge zańsyz bas bostandyǵynan aiyrý deregi boiynsha qylmystyq isti qaita jandandyrýǵa kómektesken edi.
Jábirlenýshi ýákil ókiline júginip, otbasylyq janjaldan keiin kúieýi men onyń eki tanysy ózin bailap, Shymkenttegi jyndyhanaǵa kúshtep aparyp tastaǵanyn jetkizgen. Aitýynsha, kúieýi ortalyq qyzmetkerlerimen aldyn ala kelisip, ony "aqyl-esi kem" degen jeleýmen emhanaǵa ornalastyrǵan. Nátijesinde jábirlenýshi meditsinalyq mekemede úsh kún bolǵan. Sondai-aq ol sol jerde qyzmetkerler tarapynan zańsyz áreketter bolǵanyn málimdedi.
Jábirlenýshi Túrkistan qalalyq politsiia basqarmasyna aryz jazǵan. Bastapqyda qylmystyq is qozǵalǵanymen, 2024 jyldyń tamyzynda is toqtatylǵan.
Ombýdsmen ókili ótinish berýshige quqyqtary men bostandyqtaryn qorǵaý joldaryn túsindirip, qajetti kómek kórsetken. Sonyń nátijesinde Túrkistan qalasynyń prokýratýrasy isti toqtatý týraly qaýlynyń kúshin joiyp, qylmystyq is qaita qozǵaldy.
Jábirlenýshi bul máseleniń sheshilýine kómekteskeni úshin alǵys bildirip, beinejazba joldaǵan. Ókildik azamattardyń senimin joǵary baǵalap, týyndaǵan máselelerdi jedel sheshýge jáne jumys sapasyn jetildirýge umtylatynyn atap ótti.
