Túrkiianyń Antalia qalasynda 15 maýsym kúni bolǵan jol-kólik oqiǵasy saldarynan 18 jastaǵy Qazaqstan azamaty kóz jumdy. Bul týraly marqumnyń týystary málimdedi, dep habarlaidy dalanews.kz nur.kz-ke silteme jasap.
Olardyń aitýynsha, boijetken Antaliadaǵy qonaqúilerdiń birinde óndiristik tájiribeden ótip, animator bolyp jumys istegen. Oqiǵa bolǵan túni onyń asqazany qatty aýyryp, tanysy aýrýhanaǵa alyp bara jatqan kezde jol apatyna ushyraǵan.
Qazaqstannyń Syrtqy ister ministrligi Antaliadaǵy Bas konsýldyq marqumnyń otbasyna qajetti konsýldyq-quqyqtyq kómek kórsetkenin habarlady. Atap aitqanda, qujattardy rásimdeýge jáne máiitti Qazaqstanǵa jetkizýge qoldaý kórsetilgen.
Sondai-aq vedomstvo qyzdyń qaza bolýyna qatysty mán-jai Bas konsýldyqtyń baqylaýynda ekenin, qazirgi ýaqytta Túrkiianyń quzyrly organdarymen ózara is-qimyl jalǵasyp jatqanyn málimdedi.
