Bul týraly memleket basshysynyń baspasóz hatshysy Berik Ýáli jelidegi paraqshasynda jazdy.
Memleket basshysynyń pikirinshe, úkimet eń aldymen tym kóp basqarý qurylymdaryn qysqartýmen ainalysýy kerek.
"Qasym-Jomart Toqaev úkimetten ekonomikanyń negizgi salalarynda shynaiy básekege negizdelgen orta qalyptastyrýdy jáne qor men ulttyq kompaniialardyń satyp alý júieleriniń ashyqtyǵyn qamtamasyz etýdi talap etti", - deidi Berik Ýáli.
Prezident memleket ekonomikaǵa kóp aralasa bermeýi kerek jáne osy turǵyda "Samuryq-Qazyna" qorynyń aktivterin jekeshelendirý isin jandandyrýy qajet degen pikirde.
Osyǵan orai jekeshelendirý kezinde ashyqtyqty saqtaý mańyzdy. Onsyz ekonomikany qurylymdyq turǵydan qaita qurý múmkin emes.
Prezident úkimetten jáne jekeshelendirý jónindegi memlekettik komissiiadan naqty usynystar men is-áreketter kútedi.
Eske sala keteiik, memleket basshysy 11 qańtarda ótken májilistiń plenarlyq otyrysynda "Samuryq-Qazyna" qorynyń qyzmetin tolyǵymen transformatsiialaý qajet ekenin aitqan bolatyn.
Qordyń portfeldi kompaniialary – ulttyq ekonomikanyń júie quraýshy qurylymdary. Sondyqtan qazir ekonomikany qurylymdyq jaǵynan qaita qurý jáne resýrstardy el igiligine baǵyttaý jónindegi mindetterdiń oryndalýy qordyń jumysyna bailanysty.
...
Buǵan deiin Memleket basshysy eger qordy reformalaý múlde múmkin bolmasa, ondai qurylymnyń ekonomikamyzda bolmaǵany jón ekenin basa aitqan.
Prezidenttiń aitýynsha, búginde bul qordyń aktivi elimizdiń ishki jalpy óniminiń 60 protsentine jýyqtaidy.
"Iaǵni, osy uiymnyń tiimdi qyzmeti búkil ekonomikamyzdy órkendetýge tikelei áser etedi. Qordyń infraqurylymdyq kompaniialary ekonomikamyzdyń barlyq derlik sektoryn aiqyndaidy. Osy tusta qor óziniń negizgi mindetin oryndap otyr ma? Iaǵni, ulttyq bailyqty eselei aldy ma? degen oryndy suraq týyndaidy. Qomaqty jalaqy alatyn qyzmetkerleri, direktorlar keńesi nemen ainalysady?", - degen bolatyn prezident.
Ol qyzmeti óte qymbat konstalting kompaniialaryn jáne sheteldik mamandardy jumysqa tartqanynan paida bar ma dep suraǵan.
Toqaev "Samuryq-Qazyna" qory elimizdiń strategiialyq aktivterin basqarý isinde basty ról atqaratynyn atap ótken.
"Sondyqtan úkimetke strategiialyq josparlaý jáne reformalar agenttigimen birlesip, kvazimemlekettik sektordy túbegeili reformalaý úshin usynystar ázirleýdi tapsyramyn. Eger qordy reformalaý múlde múmkin bolmasa, ondai qurylymnyń ekonomikamyzda bolmaǵany jón", – dedi Memleket basshysy.
