Memleket basshysy Qasym-Jomart Toqaev Qytai Halyq Respýblikasynyń Qazaqstandaǵy elshisi Chjan Siaony qabyldady, dep habarlaidy Dalanews.kz.
Áńgimelesý barysynda prezident Qazaqstan men Qytaidy ǵasyrlarǵa ulasqan berik dostyq pen tatý kórshilik qatynastar bailanystyratynyn atap ótti. Qasym-Jomart Toqaevtyń pikirinshe, ózara senim men qurmetke negizdelgen tiimdi yntymaqtastyqtyń nyǵaiýyna eki tarap ta úles qosyp keledi.
"Memleket basshysy búginde Qazaqstan men Qytaidyń yqpaldastyǵy qarqyndy ári san qyrly sipat alǵanyn aitty. Eki el arasynda belsendi saiasi dialog qalyptasty, saýda-ekonomikalyq áriptestik órkendedi, mádeni bailanystar jandandy jáne bilim berý baǵdarlamalary men ǵylymi jobalardyń sany artty. Qaýipsizdik salasynda, ásirese, "úsh zulym kúshke" qarsy kúres baǵytynda tyǵyz yntymaqtastyq ornaǵan. Budan bólek, elderimizdiń BUU, ShYU, AÓSShK aiasyndaǵy, sondai-aq "Ortalyq Aziia – Qytai" formatyndaǵy halyqaralyq bailanystary belsendi órbip keledi. Prezidenttiń aitýynsha, Qazaqstan men Qytai tatý kórshilik qarym-qatynastyń naǵyz úlgisin kórsetip otyr.
Óz kezeginde Qytai elshisi Chjan Siao Qasym-Jomart Toqaevqa alǵys aityp, Beijińniń jan-jaqty strategiialyq seriktestikti odan ári damytýǵa beiil ekenin rastady.
Memleket basshysy Chjan Siaonyń qazaq-qytai dostyǵyn tabysty damytýǵa, memleketaralyq bailanystardy tereńdetýge qosqan úlesin joǵary baǵalap, II dárejeli "Dostyq" ordenimen marapattady", - delingen Aqorda habarlamasynda.
