Memleket basshynyń atap ótkenindei Qazaqstan Eýraziia qurlyǵynda júrip jatqan úderisterdiń ortasynda bolǵanyn qalaidy.
Elimizdiń álemniń osy bóligindegi saýda joldary men halyqaralyq qatynastardy retteýde asa mańyzdy ról atqararyna airyqsha toqtalǵan Toqaev: "Qazaqstannyń bolashaǵy jarqyn bolatynyna senimdimin. Sol sebepti elimdi ekonomikasy damyǵan, ozyq elderdiń qataryna qosý úshin bar kúsh-jigerimdi jumsaimyn.
Qazaqstan osyndai syrtqy saiasat ustansa, tabysqa jetedi. Beibitshilikti jaqtaý, barlyq elmen tiimdi dostyq qatynasta bolý bizdiń tarihi taǵdyrymyzǵa jazylǵan", - dedi.
Bul tarapta kórshiles eldermen aradaǵy dostyqqa mán berý qajet, sonyń ishinde Qytai asa mańyzdy ról atqarady.
"Qytai bizdiń syrtqy saiasatymyzda asa mańyzdy ról atqarady. 2019 jyly qyrkúiek aiynda men Qytaiǵa memlekettik saparmen bardym. Biz QHR Tóraǵasy Si Tszinpinmen nátijeli kelissóz júrgizdik. Halyqtarymyzdyń yntymaqtastyǵyn nyǵaitý úshin eki jaqqa da tiimdi saiasat júrgizý jóninde ýaǵdalastyq.
Demek, biz eki el arasyndaǵy strategiialyq seriktestikti, máńgi dostyqty nyǵaita túsýimiz kerek.
Bul qazaq halqynyń múddesine, naqtyraq aitqanda, uzaqmerzimdi múddesine tolyq sai keledi. Men osyndai saiasatty berik ustanýǵa niettimin. Jaqyn kórshimiz – Qytaimen aradaǵy strategiialyq seriktestiktiń mańyzdy ekeni sózsiz", - dedi Toqaev osy oraida.
Qytai ekonomikasy álemde ekinshi orynda turǵanyn tilge tiek etken Memleket basshysy taraptardyń ekonomikalyq yntymaqtastyq salasynda keremet nátijelerge qol jetkizgenin atap ótti.
"Sondyqtan men Qytai órkenietiniń besigi sanalatyn Sian qalasyna jasaityn aldaǵy saparymnan úmitim mol. Bizge jańa kelisimder, jańa mámileler qajet.
Sebebi biz bir orynda qalyp, nátije kútip otyrmaýymyz kerek. Osynaý kúrdeli álemde ekonomikalyq bailanystarymyzdy nyǵaitýǵa kúsh salýǵa tiispiz. Men eki el jastarynyń yntymaqtastyǵy men dostyq qarym-qatynasyn damytýǵa niettimin. Jas býyn birin-biri jaqsy bilýi qajet", - dedi Prezident.
Aita ketelik, byltyr qańtar aiynda beinebailanys formatynda Qytai jáne Ortalyq Aziia memleketteri basshylarynyń sammiti ótken edi. Sodan keiin aqpanda Ortalyq Aziianyń tórt memleketiniń basshysy Beijińdegi Qysqy Olimpiada oiyndarynyń ashylýyna qatysqan.
Ústimizdegi «Qytai – Ortalyq Aziia» sammiti ótedi.
"Tuńǵysh «Qytai – Ortalyq Aziia» sammitinen ne kútesiz?" degen tilshiniń saýalyna Toqaev bylai dep jaýap berdi:
"Sian sammiti nátijeli bolady dep úmittenemin. Qytai bizdiń aimaqta, iaǵni Ortalyq Aziiada óte mańyzdy ról atqarady. Bulai bolýy zańdy da.
Ortalyq Aziia elderindegi áriptesterim Qytaimen aradaǵy qatynas bizge tiimdi ekenine kelisedi dep oilaimyn. Osy yntymaqtastyqty ilgeriletýge biz de bar kúsh-jigerimizdi jumsaimyz".
Suhbat barysynda Memleket basshysyna sońǵy jyldary geosaiasattyń kún tártibinen túspei turǵan Taivan týraly suraq qoiyldy.
"Jalpy, búkil álem myna máseleni anyq túsinýi kerek dep sanaimyz. Eki Qytai bolmaýy kerek. Taivan – Qytaidyń bir bóligi. Demek, BUU Jarǵysynda bekitilgen barlyq memleketterdiń aýmaqtyq tutastyǵy týraly qaǵidat múltiksiz saqtalýǵa tiis. Bul qaǵidat Shanhai yntymaqtastyq uiymynyń Jarǵysy men deklaratsiiasyna da engizildi.
Sondyqtan taǵy da qaitalap aitamyn, biz úshin Taivan – Qytaidyń bir bóligi. Bul anyq. Oǵan eshqandai shúbá keltirmeimiz"
- dedi Memleket basshysy.
Suhbattyń sońynda Shanhai yntymaqtastyq uiymynyń áleýeti sóz bolyp, Qytai tilshisi biyl ShYU-ǵa tóraǵalyq mindetin Qazaqstan qabyldap alaryn eske saldy.
Shanhai yntymaqtastyq uiymynyń – kelesheginen kóp nátije kúttiretin, óte yqpaldy uiym ekenin málim etken prezident Toqaev uiym qurylǵan kezden bastap oǵan Qytaidyń zor qoldaý kórsetip jatqanyn nazarǵa aldy.
"ShYU óz qyzmetin 1996 jyly Shanhaida bastady. Qazaqstannyń Syrtqy ister ministri retinde uiymnyń jumysyn bastaý rásimine qatystym.
Iaǵni, Shanhai yntymaqtastyq uiymynyń qyzmetine qurylǵan sátten bastap atsalysqanymdy maqtan tutamyn.
Árine, Qazaqstan uiymnyń keleshek tóraǵasy jáne osy uiymǵa múshe elder sammitin uiymdastyrýshy memleket retinde ShYU-nyń áleýetin arttyrý úshin qoldan kelgenniń bárin jasaidy. Buǵan deiin aitqanymdai, bul uiym – álemde óte tanymal ári yqpaldy", - dedi ol.
