Bas prokýror Ǵizat Nurdáýletov «Qasiretti qańtar» oqiǵasyna qatysty tergeý jumystarynyń barysy týraly baiandady. Onyń aitýynsha, qazirgi ýaqytta 3024 qylmystyq is boiynsha tergeý amaldary júrgizilýde. Arnaýly prokýrorlardyń basshylyǵymen vedomstvoaralyq tergeý toby jappai tártipsizdikter men terrorlyq aktiler boiynsha 177 isti qarap jatyr.
Prokýratýra organdarynyń málimeti boiynsha 779 adam qamaýda otyr. Olardyń arasynda uiymdasqan qylmystyq toptardyń 24 múshesi bar. 113 adam kisi óltirý, urlyq, tonaýshylyq jáne qaraqshylyq áreketteri úshin buryn sottalǵan.
Ustalǵandardyń tulǵalary anyqtalǵan soń, sondai-aq densaýlyq jaǵdailaryna bailanysty jáne basqa da materialdar boiynsha 109 azamattyń qamaýǵa alý jazasy ketip qalmaý jónindegi qolhatpen jáne jeke kepildik berýmen almastyrylǵan.
Prokýrorlar azamattardyń tártipsizdikke qatysy bar ekeni dáleldenbegenin negizge ala otyryp, taǵy da 103 adamdy bosatqan. Ustalǵandardy azaptaý týraly árbir habarlama jiti tekseriledi.
Prokýrorlar advokattarmen, quqyq qorǵaýshylarmen jáne Adam quqyqtary jónindegi ýákilmen árdaiym bailanysta. Olarǵa tergeý izoliatorlaryna, ýaqytsha ustaý izoliatorlaryna jáne ustalý sebebin anyqtaityn arnaýly oryndarǵa kirýge múmkindik berilgen.
Jalpy prokýratýraǵa ustalǵandar tarapynan 305 shaǵym túsken. Quqyq buzýshylyqqa qatysty 62 shaǵym rastalmady. Azaptaý jáne biligin asyra paidalaný deregi boiynsha 170 qylmystyq is qozǵaldy.
«Árbir isti egjei-tegjeili tekseremiz jáne bultartpas dálelder bolǵan jaǵdaida ǵana kinálilerdi jaýapkershilikke tartamyz, – dedi Bas prokýror.
Sonymen qatar keńeste Ulttyq qaýipsizdik komitetiniń tóraǵasy, Ishki ister ministri, Qorǵanys ministri jáne Premer-Ministrdiń orynbasary – Syrtqy ister ministri baiandama jasady.
Prezident keńesti qorytyndylai kele, qańtar oqiǵasy boiynsha muqiiat jáne shynaiy tekserý júrgizý, ustalǵan azamattardyń quqyqtaryn qorǵaý, tekserý barysy týraly halyqqa ýaqtyly aqparat berý jóninde memlekettik organdarǵa tapsyrma berdi.
