Memleket basshysynyń QR Parlamenti Májilisi jáne máslıhat depýtattary saılaýyn taǵaıyndaý týraly úndeýi
Qurmetti otandastar!
Búgin men Parlament Májilisi depýtattarynyń saılaýyn taǵaıyndaý týraly Jarlyqqa qol qoıdym. Ortalyq saılaý komısıasynyń qaýlysymen barlyq deńgeıdegi máslıhat depýtattarynyń saılaýy taǵaıyndaldy.
Aldaǵy saılaý konstıtýsıalyq merzimge sáıkes, 2021 jyldyń 10 qańtarynda ótedi. Barlyq saıası partıalardyń bul saılaý naýqanyna qatysýǵa daıyndalýyna, saılaý aldyndaǵy platformasyn ázirleýine, partıalyq ınfraqurylymdardy jetildirýine ýaqyty jetkilikti boldy.
Ortalyq saılaý komısıasy men Bas prokýratýra saılaýdyń zańdylyǵyn, ashyqtyǵyn jáne ádildigin saqtaý úshin turaqty baqylaý júrgizip otyrady.
Jańa saılaý naýqanyna deıin saıası jańǵyrý, kóppartıalyqty damytý jáne elimizdiń qoǵamdyq-saıası ómirine azamattardyń qatysý aıasyn keńeıtý jóninde sharalar qabyldandy.
Birinshi. «Qazaqstan Respýblıkasynyń Parlamenti jáne onyń depýtattarynyń mártebesi týraly» konstıtýsıalyq zańǵa jáne «Qazaqstan Respýblıkasy Parlamentiniń komıtetteri men komısıalary týraly» zańǵa túzetýler engizý arqyly parlamenttik opozısıa ınstıtýtyn qurý máselesin qarastyratyn jáne onyń qyzmetin reglamentteıtin ózgerister men tolyqtyrýlar jasaldy.
Endi Parlament Májilisi turaqty komıtetteriniń bir tóraǵasy men eki hatshysy parlamenttik opozısıa depýtattary arasynan saılanady.
Sonymen qatar, parlamenttik opozısıa bir sesıa kezinde keminde bir ret parlamenttik tyńdaý ótkizý jóninde bastama kóterý quqyǵyn ıelenedi. Sondaı-aq bir sesıa kezinde keminde eki ret úkimet saǵatynyń kún tártibin aıqyndaıtyn bolady.
Budan bólek, saıası partıalar fraksıalarynyń jetekshilerine Parlament palatalarynyń birlesken otyrystarynda, Parlament Májilisiniń plenarlyq otyrystarynda, turaqty komıtetterdiń, jumys toptarynyń otyrystarynda, parlamenttik tyńdaýlarda jáne basqa is-sharalarda sóz sóıleýge kepildi quqyq beriledi.
Ekinshi. «Qazaqstan Respýblıkasyndaǵy saılaý týraly» konstıtýsıalyq zańda jáne «Saıası partıalar týraly» zańda qarastyrylǵan erejeler boıynsha parlamenttik tájirıbemizde alǵash ret partıalyq tizimge áıelder men jastar úshin 30 paıyzdyq kvota engizildi. Bul norma Parlamentke jáne jergilikti ókildi organdarǵa áıelder men jastardy tartýdyń tıimdi joly retinde olardyń elimizdegi qoǵamdyq-saıası úderisterge belsendi qatysýyna septigin tıgizedi.
Úshinshi. Aldaǵy máslıhattar saılaýy alǵash ret partıalyq tizim boıynsha ótedi. Proporsıonaldy model álemdik demokratıalyq tájirıbege tolyq saı keledi, saıası júıeni nyǵaıtýǵa, demokratıany damytýǵa yqpal etedi, saıası partıalardyń jumysyn jandandyrady.
Bul jańa bastamalar partıalarǵa elimizdiń saıası júıesindegi ustanymyn nyǵaıtý úshin qosymsha múmkindikter beredi.
***
Koronavırýs pandemıasy saldarynan týyndaǵan kúrdeli ekonomıkalyq daǵdarys kóptegen eldi qamtydy, sondaı-aq, búkil álemdik ekonomıkaǵa keri áser etti.
Qazirgi kúrdeli kezeńde Qazaqstannyń aldynda daǵdarysqa qarsy tıimdi sharalar qabyldaý, ornyqty ekonomıkalyq damýdy jáne azamattarymyzdyń áleýmettik ıgiligin qamtamasyz etý, halyqtyń ál-aýqatyn arttyrý mindeti tur.
Osy basymdyqtar jóninde meniń Qazaqstan halqyna arnaǵan Joldaýymda aıtyldy.
Parlamenttiń jáne jergilikti ókildi organdardyń jańartylǵan quramy elimizdegi áleýmettik-ekonomıkalyq reformalardy sapaly ári zańnamalyq turǵydan qamtamasyz etýge basa mán beredi.
Aldaǵy saılaý elimizdiń saıası júıesin jańartýdy qamtamasyz etetin saıası ınstıtýttardy dáıekti túrde demokratıalandyrýǵa jáne jańǵyrtýǵa Qazaqstannyń asa yqylasty ekenin taǵy da bir dáleldeıtin bolady.
Bizdiń ortaq mısıamyz – Qazaqstandy órkendetý, azamattarymyzdyń ıgiligi úshin qyzmet etý. Qazaqstan halqy asa mańyzdy tarıhı syndarly sátterde bir jeńnen qol, bir jaǵadan bas shyǵara bildi. Halqymyz osy joly da elimizdi jan-jaqty jańǵyrtý baǵytyndaǵy jańa tarıhı mısıasyn laıyqty atqarady dep senemin. Táýelsizdiktiń 30 jyldyǵy qarsańynda elimiz kemeldene túsip, damýdyń jańa kezeńine shyǵatynymyz anyq.
Memleketimizdiń barlyq azamattaryn belsendi azamattyq ustanymyn tanytýǵa, Parlament Májilisiniń jáne máslıhattardyń aldaǵy saılaýyna uıymshyldyqpen qatysýǵa shaqyramyn.
