Qyzylordada Memleket basshysy Qasym-Jomart Toqaevtyń tóraǵalyǵymen Ulttyq quryltaidyń V otyrysy ótti, dep habarlaidy Dalanews.kz.
️Qasym-Jomart Toqaev eldegi avtokólik joldaryn halyqaralyq standarttarǵa sai jańǵyrtý airyqsha mańyzdy mindet ekenin málimdedi.
"Bul, birinshiden, Qazaqstannyń batys pen shyǵys arasyndaǵy tranzit dálizi retindegi rólin arttyra túsedi. Ekinshiden, oblystar arasyndaǵy kólik bailanysyn barynsha jaqsartady. Jaqynda Qyzylorda – Jezqazǵan jolynyń Qyzylordaǵa tiesili bóligi salynyp bitti. Jyl sońyna deiin Ulytaý oblysyndaǵy bóliginde kólik qozǵalysy tolyq ashylady. Joldyń jalpy uzyndyǵy – shamamen 400 shaqyrym. Eń bastysy, biyl elimizde buryn-sońdy bolmaǵan aýqymdy infraqurylymdyq jobalar bastalady", - dedi Toqaev.
Prezidenttiń pikirinshe, "Batys Qytai – Batys Eýropa" – Qazaqstandaǵy eń negizgi joldyń biri.
"Alaida onyń Qyzylorda – Aqtóbe arasyndaǵy bóligi tar, kólik apattary jii bolyp jatady. Men osyǵan deiin bul joldy keńeitý týraly tapsyrma berdim. Biyl osy baǵytta tórt jolaqty jańa kúre joldyń qurylysy bastalady. Qazirgi joldyń kóbi oblystardyń ishki joly bolyp qala beredi. Sondai-aq, men byltyrǵy Joldaýymda "Beineý – Sekseýil" jolynyń qurylysyn tezdetýdi tapsyrǵanymdy bilesizder. Ondaǵy jumystar da biyl bastalmaq. Joba júzege asqan soń "Orta dálizdiń" qashyqtyǵy 900 shaqyrymǵa qysqarady, iaǵni, Aqtaý, Quryq porttaryna týra jol ashylady", - dedi Memleket basshysy.
Prezident Qaraǵandy – Jezqazǵan baǵytyndaǵy jol talai jyldan beri tozyp turǵanyn málimdedi.
"Biyl eski joldyń qaptalyna eki jolaqty jańa jol salýǵa kirisemiz Keiin eski joldy da jańǵyrtyp, tórt jolaq etý josparlanýda. Budan bólek, Saryaǵash mańyndaǵy kólik qozǵalysy da óte tyǵyz. Sondyqtan, osy jyly "Saryaǵash ainalma jolynyń" qurylysy qolǵa alynady. Barlyq jumystyń sapaly ári ýaqytyly oryndalýyn tikelei baqylaýda ustaityn bolamyn. Sebebi bul jobalar Qazaqstannyń halyqaralyq kólik-logistika ortalyǵy retindegi áleýetin meilinshe nyǵaita túsedi", - dedi Toqaev.
