Alqaly basqosýda sóz sóilegen Memleket basshysy Qasym-Jomart Toqaev:
– Búgingi otyrysqa deiin atqarylǵan jumysymyzdyń naqty nátijesi bar. Birer kún buryn men «Qazaqstan Respýblikasynda beibit jinalystardy uiymdastyrý jáne ótkizý tártibi týraly» jańa Zańǵa qol qoidym. Bul qujattyń basty ereksheligi – budan bylai beibit jinalys ótkizý úshin ruqsat alý qajet emes. Ony aldyn ala eskertip, ótkizýge bolady. Osy zań qoǵamdyq-saiasi qatynastardy demokratiialyq jolmen odan ári damytýǵa zor úles qosady, – dep beibit jiyndarǵa qatysty óz oiyn bildirdi.
Óz kezeginde Prezident jańa zań azamattardyń beibit jiyndar ótkizýge konstitýtsiialyq quqyǵyn tolyq qamtamasyz etetinin alǵa tartty.
Óz kezeginde Memleket basshysy saiasi reformalardyń birinshi toptamasyna kiretin basqa da zań jobalary ázirlenip jatqanyn alǵa tartty. Bul rette Sailaý týraly jáne Saiasi partiialar týraly zańdarǵa ózgerister enip jatqany belgili.
– Biz parlamenttik oppozitsiia institýtyn engizdik. Saiasi partiialardy tirkeýge qatysty talap jeńildetildi. Sailaýǵa túsetin saiasi partiialar áielder men jastar úshin otyz paiyzdyq kvota bóletin bolady. Jala jabýdy qylmys sanatynan alyp tastaý jáne Qylmystyq kodekstiń 174 babyn izgilendirý jónindegi normalarǵa azamattar barynsha qoldaý bildirdi. Budan bólek, basqa da máseleler boiynsha naqty nátije bar, – dedi Q.Toqaev óz sózinde.
