Memlekettik keńesshi Tarıhshylardyń ulttyq kongresiniń forýmyna qatysty.
Búgin Astana qalasynda Qazaqstan tarıhshylary ulttyq kongresiniń forýmy ótti. Oǵan Memlekettik keńesshi Erlan Qarın qatysty. Alqaly jıynda elimizdegi ǵylymı qaýymdastyqtyń 300 ókili, onyń ishinde tarıhshy-zertteýshiler, joǵary oqý oryndarynyń oqytýshylary, sondaı-aq qoǵam qaıratkerleri men buqaralyq aqparat quraldarynyń ókilderi bas qosty.
Forýmnyń plenarlyq otyrysynda jáne jeti jumys seksıasynda arheologıa, etnografıa, etnologıa, tarıhı geografıa salalaryndaǵy jańalyqtardy taldaý, júıeleý jáne ǵylymı aınalymǵa engizý máseleleri qarastyryldy. Sonymen qatar Qazaqstan zertteýshileriniń shetel muraǵattarynda, mýzeılerinde jáne kitaphana qorlarynda júrgizgen zertteýleriniń nátıjeleri qaraldy. Basqosýdyń basty taqyrybynyń biri «Qazaqstan tarıhy: ejelgi dáýirden búginge deıin» atty jańa akademıalyq basylymdy daıyndaý barysyn talqylaý boldy. Bul jobaǵa bes ǵylymı zertteý ınstıtýty jáne elimizdiń 250-den astam ǵalymy jumyldyryldy.
Memlekettik keńesshi óz sózinde Tarıhshylardyń ulttyq kongresi elimizdegi tarıh ǵylymyn damytý turǵysynan zor mańyzǵa ıe ekenin atap ótti. Sondaı-aq Saıası qýǵyn-súrgin qurbandaryn tolyq aqtaý jónindegi memlekettik komısıa jumysynyń nátıjesi jáne Qazaqstan tarıhynyń jeti tomdyq basylymyn daıyndaý barysy týraly baıandady.
Erlan Qarın sońǵy jyldary ǵylymı aınalymǵa engizilgen arheologıalyq oljalar men arhıvtik qujattar ultymyzdyń tarıhyn neǵurlym birtutas ári keń aýqymda qabyldaý qajettigin aıǵaqtaıdy dep atap ótti.
«Qazaqstan – kóshpendilerdiń ejelgi memlekettik qurylymdarynyń besigi jáne bir kezdegi qýatty elder men ımperıalardyń murageri ǵana emes, sonymen qatar tutas kóshpendiler órkenıetiniń oshaǵy men ortalyǵy. Sondyqtan ulttyq tarıh ǵylymynyń mindeti – halqymyzdyń tarıhyna órkenıet paradıgmasy turǵysynan aýqymdyraq jáne keńirek qaraý, ony osy ustanym boıynsha dáripteý», – dedi Memlekettik keńesshi.
Forýmǵa qatysýshylar sóz sóılep, ejelgi dáýirden búginge deıingi Qazaqstan tarıhyna qatysty kóptomdyq akademıalyq basylymdy ázirleý jumystaryna joǵary baǵa berdi. Sondaı-aq arheologıalyq jáne tarıhı-mádenı eskertkishterdi zertteý aýqymyn keńeıtý, muraǵat pen aımaqtaný isin odan ári damytý, oqýlyqtardy jáne tarıhty oqytý ádistemesin jetildirý qajettigine toqtaldy.
