Almaty oblysynyń Talǵar qalasynda segiz jasar qyzǵa qatysty ádepsiz áreket jasamaq boldy degen kúdikpen er adam ustaldy. Bul týraly balanyń ata-anasy áleýmettik jelide málimdedi, dep habarlaidy dalanews.kz.
Oqiǵa 24 tamyzda bolǵan. Anasynyń aitýynsha, úshinshi synypqa baratyn qyzy qurbysynyń úiinen velosipedpen qaityp kele jatqan. Jolda shamamen 40–50 jastaǵy beitanys er adam ony toqtatyp, velosipediniń dóńgelegine tas turyp qalǵanyn aityp, kómektesýge ýáde bergen.
Ata-anasynyń sózinshe, kúdikti balany aialdama qalqasynyń tasasyna aparyp, denesine qol tigizgen jáne ádepsiz áreket jasaýǵa talpynǵan. Qyz qarsylyq bildirip, jylai bastaǵannan keiin er adam ony jibergen.
Talǵar aýdandyq politsiia basqarmasynyń qyzmetkerleri kúdiktini jedel anyqtap, ustaǵan.
Balanyń ákesi ustalǵan azamattyń buryn adam ólimine qatysty qylmys boiynsha sottalǵanyn jetkizdi.
"Ol azamat adam ólimi boiynsha 25 jylǵa sottalǵan eken. Biyl bostandyqqa shyqqan. Qyzymyzdy kóshede kele jatqan jerinen aialdamanyń tasasyna aparyp, seksýaldyq sipattaǵy áreket jasamaq bolǵan. Ol oiyn sońyna deiin júzege asyra almaǵanymen, mundai áreketke bardy. Bul adam biz úshin de, balalar úshin de óte qaýipti", - deidi qyzdyń ákesi.
Sondai-aq ol istiń tergelý barysyna alańdaitynyn jetkizdi.
"Qazir osy oqiǵa boiynsha is qozǵalyp jatyr. Biraq is burmalanyp jatqan siiaqty kórinedi, tergeý barysy bizdi qanaǵattandyrmai otyr. Kúdiktiniń aǵasy Talǵar qalasynda advokat bolyp jumys isteitinin bildik", - dep qosty ol.
Qazirgi ýaqytta otbasyǵa zańgerlik qoldaý kórsetilip, balaǵa psiholog mamandar kómektesip jatyr.
