Resei men Ýkraina Herson oblysyndaǵy ýaqytsha basyp alynǵan Oleshki qalasynda gýmanitarlyq operatsiia júrgizý úshin jergilikti atysty toqtatýǵa kelisti. Kelisim azyq-túlik pen dári-dármek jetkizýge, sondai-aq beibit turǵyndardy evakýatsiialaýǵa jaǵdai jasaý úshin jasalǵan, dep habarlaidy dalanews.kz.
Reuters agenttiginiń málimetinshe, atysty toqtatý rejimi 27 qazanda kúshine endi. Resei Qorǵanys ministrligi Máskeý ýaqyty boiynsha tańǵy saǵat 04:00-den bastap Herson baǵytyndaǵy atysty toqtatqanyn habarlady. Ýkrainanyń adam quqyqtary jónindegi ýákili Dmitrii Lýbinets te Kievtiń kelisim sharttaryn oryndap jatqanyn rastady.
Oleshki qalasy 2022 jyldan beri Resei áskeriniń baqylaýynda. Qalada qalǵan turǵyndar azyq-túlik pen dári-dármek tapshylyǵyna tap bolyp, meditsinalyq kómek pen taza sýǵa muqtaj. Ártúrli baǵalaýlar boiynsha, eldi mekende 2 myńǵa jýyq adam qalǵan.
AQSh Aq úiiniń buǵan deiingi málimdemesine sáikes, kelisimge qol jetkizýge AQSh-tyń birinshi hanymy Melaniia Tramptyń araǵaiyndyǵy yqpal etken. Onyń ókilderi Resei jáne Ýkraina taraptarymen kelissózder júrgizip, gýmanitarlyq kómekti jetkizý men turǵyndardy qaýipsiz dáliz arqyly kóshirý sharttaryn úilestirgen.
Jospar boiynsha, áskeri emes ókilder turǵyndardyń jaǵdaiyn baǵalap, qandai kómek qajet ekenin anyqtaýy kerek. Qalany tastap ketkisi keletin adamdarǵa qaýipsiz baǵyt pen kólik uiymdastyrý kózdelgen.
Sonymen birge atysty toqtatý búkil maidan shebine taralmaidy. Reuters agenttiginiń habarlaýynsha, Ýkraina men Reseidiń basqa aýmaqtarynda áskeri áreketter jalǵasyp jatyr.
Osylaisha, Oleshkidegi jergilikti bitim soǵys jaǵdaiynda gýmanitarlyq kómek jetkizý men beibit turǵyndardy evakýatsiialaýǵa arnalǵan shekteýli kelisim bolyp otyr.
