Qazaqstan prezidenti Pekinge 17-18 qazanda ótetin "Bir beldeý, bir jol" forýmyna qatysý úshin bardy. Qytaidyń "Bir beldeý, bir jol" resmi portalynyń málimetine qaraǵanda, bul baǵdarlamany júzdegen el qoldaǵan. Pekin osy bastamasyn júzege asyrý úshin 200-ge jýyq kelisim jasasqan.
Qazaqstan prezidenti Qasym-Jomart Toqaev pen Qytai tóraǵasy Si Tszinpin 17 qazanda Pekinde kelissóz ótkizdi.
"Áńgime kezinde Si Tszinpin Toqaevty "eski dosym" dep atap, qarqyndy damyp kele jatqan Qytai-Qazaqstan qatynastary eki eldiń damýyna jáne aimaqtaǵy beibitshilik pen turaqtylyqty damytýǵa múmkindik beredi dep málimdedi" dep habarlaidy CCTV.
"Halyqaralyq jaǵdai qalai ózgergenine qaramastan Qytai men Qazaqstan áý bastaǵy maqsatynan ainymai, ózara kómek, tatý kórshilik tujyrymdamasy men eki el arasyndaǵy seriktestikti jan-jaqty damyta berýge tiis" degen Si Tszinpin sózin Reuters agenttigi de taratty.
Aqordanyń jazýynsha, Qytai biligi Qazaqstannyń egemendigi men aýmaqtyq tutastyǵyn jáne "Toqaevtyń reformalaryn" tolyq qoldaitynyn atap ótken.
Qazaqstan prezidenti Qasym-Jomart Toqaev Astana men Pekin barlyq baǵyt boiynsha eki memleket tiimdi bailanys ornatqanyn atap ótip, "Bir beldeý, bir jol" jobasynyń tamasha qorytyndylarymen quttyqtaǵan.
Toqaevtyń sózinshe, Qytai jetekshisiniń byltyr qyrkúiektegi Qazaqstanǵa sapary eki el arasyndaǵy bailanysty nyǵaitýǵa tyń serpin bergen.
"Sapar aiasynda elderimiz arasyndaǵy yntymaqtastyqtyń jańa "altyn 30 jyldyǵy" bastaldy. Memleketterimiz arasyndaǵy saýda-sattyq tabysty damyp keledi. Investitsiianyń jalpy kólemi 21 milliard dollar bolatyn 52 birlesken joba júzege asyrylyp jatyr. 2024 jyl Qytaida Qazaqstan týrizmi jyly bolyp jariialandy" dedi Toqaev.
Resmi aqparatqa qaraǵanda, eki tarap energetika, kólik-tranzit salasyn, atom ónerkásibi men ónerkásip, mashina jasaý men týrizmdi damytý máselelerin talqylaǵan.
Aqorda taratqan aqparatqa qaraǵanda, Qasym-Jomart Toqaev pen Si Tszinpinniń kelissózinen keiin eki el delegatsiiasy Qazaqstan men Qytai arasyndaǵy Transkaspii halyqaralyq kólik jolyn, sonyń ishinde Qytai-Eýropa qatynasyndaǵy konteinerlik poiyz tasymalyn damytý jónindegi kelisimge qol qoiǵan.
https://dalanews.kz/sadak/94115-bolat-nazarbaevtyng-altyn-biznesi-kim
