Aqtóbe qalasynyń ákimi Azamat Beket sý tasqynyna bailanysty turǵyndarǵa eskertý jasap, ún qatty, - dep habarlaidy Dalanews.kz.
Azamat Bekettiń sózinshe, Hromtaý aýmaǵynda ornalasqan Maǵajan sý qoimasynyń jarylyp ketý qaýpi bar. Osyǵan bailanysty Aqtóbe sý qoimasyna úlken kólemde sý quiylady degen boljam bar.
"Aqtóbe sý qoimasynyń tolýyna bailanysty shliýzdi ashýǵa májbúrmiz. Bul sýdyń jaǵasynan asyp ketýine ákelýi múmkin ekenin eskertemiz. Kirpishti kópiri aýdanyndaǵy Elek ózeni men Qarǵaly ózeniniń mańynda ornalasqan baý-baqsha ujymdarynyń turǵyndaryn evakýatsiialaýǵa kelisim berip, úilerińizden shyǵýdy suraimyn.
Biz úshin sizderdiń ómirlerińiz óte mańyzdy. Ózderińiz bilesizder naýryzdyń 26-sy kúni qala aýmaǵynda kúnniń kúrt jylynýyna bailanysty dala sýlary kóterildi. Birneshe turǵyn alaptar men baý-baqsha ujymdaryna qaýip tóndi. Búgingi kúni 73 úige sý kirdi. 155 adam evakýatsiialandy. Sý tasqyny saldarynan zardap shekken turǵyndarǵa kómek beriledi", – dedi ákim.
Artynsha qala ákimi evakýatsiialyq pýnktterge baryp, túnde sý basý qaýpine bailanysty úilerin tastap shyqqan turǵyndarmen kezdesip qaitqan.
"Ózderińiz biletindei, Aqtóbe qalasynda tótenshe jaǵdai jariialandy. Biz keshe túnde sý tasqyny bolýy múmkin aimaqtarda turatyn azamattardy evakýatsiialadyq. Úilerin sý basqan turǵyndar kómeksiz qalmaidy, jariialanǵan tótenshe jaǵdai aiasynda kómek beriledi. Osy sý tasqynyna qarsy sharalar aiaqtalyp, biryńǵailanǵannan keiin komissiia ár úidiń jaǵdaiyn qaraýmen ainalysatyn bolady. Zardap shekkenderdiń eshqaisysy nazardan tys qalmaidy.
Evakýatsiialyq jáne sý tasqynyna qarsy is-sharalarǵa 835 adam, 340 tehnika jumyldyryldy. Qazirgi ýaqytqa 2125 adam, onyń ishinde 870 bala qalanyń 53 mektebinde ornalasty. Ystyq tamaq uiymdastyrylǵan", - deidi ákim.
Azamat Bekettiń sózinshe, komissiia barlyq úige keltirilgen shyǵyndy túgendegennen keiin zardap shekkender tolyq kólemde kómek alady. Qalada tótenshe jaǵdai rejimi kómek tólenip bolǵanǵa deiin sheshilmeidi.
"Keltirilgen shyǵyndardy baǵalaý jónindegi komissiia quryldy. Komissiia erteń, dúisenbiden bastap sý shaiǵan eldi mekender men baý-baqsha úilerin túgendeý, tekserý júrgizýdi bastaidy. Birde bir úi nazardan tys qalmaidy.
Komissiia úilerge táýelsiz baǵalaýshy kompaniia ókilderimen birge barady, qansha úidiń ishine sý kirgeni, múlikterdiń búlingeni anyqtalady. Úileri sýǵa ketken aýmaqta qalǵan turǵyndarǵa komissiia baratyny týraly Astana jáne Almaty aýdandary arqyly habarlanyp otyrady", - deidi qala basshysy.
