Almatylyq azamat Álnur Iliashev Resei jalǵa alyp otyrǵan Saryshaǵan zymyran synaq poligonynyń Jambyl aýdany Úlken aýylynda salynyp jatqan atom elektr stantsiiasyna jaqyn ornalasýyn qaýipti dep sanaidy. Ol bul jaǵdai onyń konstitýtsiialyq quqyqtaryn jáne MAGATE qaýipsizdik normalaryn buzady dep esepteidi, dep habarlaidy Dalanews.kz.
Eske salsaq, maýsym aiynda Iliashev Qazaqstan Úkimetin sotqa berip, atom elektr stantsiiasynyń ornyn anyqtaý jónindegi qaýlysyn zańsyz dep tanýdy talap etken. Óitkeni qurlyqtyq ballistikalyq zymyrandar synaqtan ótetin poligon Úlken aýyldyq okrýginen nebári 22 shaqyrym jerde batysqa qarai ornalasqan.
Alaida 10 shildede Astananyń azamattyq ister jónindegi mejraiondyq soty talapty qanaǵattandyrýdan bas tartqan. Sottyń sheshimi boiynsha, AES-tiń naqty qai jerge salynatyny áli belgisiz, al Úlken aýyldyq okrýginiń aýmaǵy aýqymdy.
8 tamyzda Úlken aýylynyń mańynda AES qurylysyna bastaý berý rásimi ótti. Al 25 qyrkúiekte Qazaqstandaǵy alǵashqy AES-ke ataý berý boiynsha konkýrs jariialandy. Sol kúni Iliashev birinshi satydaǵy sot sheshimine apelliatsiialyq shaǵymyn qaraýǵa berdi.
Apelliatsiialyq shaǵymynda ol alǵashqy sottyń sheshimin zańsyz dep sanaitynyn, sebebi sot istiń mán-jaiyn tolyq zerttemei, protsessýaldyq normalardy buzǵanyn aitty.
Ol dálel retinde 1975 jylǵy qaiǵyly oqiǵaǵa qatysty derekterdi qosa usyndy. «Karavan» gazetinde jariialanǵan maqalada Astrahan oblysynan ushyrylǵan zymyran Maqat poligonyna jetpei, Gýrev qalasynda (qazirgi Atyraý) eki turǵyn úidi qiratqany, saldarynan 8 adamnyń qaza tapqany jazylǵan. Maqala avtory Atyraý oblystyq UQKD arhivterine súiengen. Iliashev osy derekterdi rastaýdy surap, resmi suraý salǵanymen, jaýap ala almaǵan.
Qorǵanys ministrligine de júgingen ol vedomstvodan «bul qujattar UQK arhivinde» degen jaýap qana alǵan. Al jalpy derekter burynǵy KSRO Qorǵanys ministrligi arhivterinde qalyp qoiǵany aitylǵan. Degenmen, ministrlik poligon aýmaǵynan tys jerlerde zymyran qaldyqtarynyń tabylǵanyn rastady.
"Jergilikti turǵyndar (shopandar, diqandar) synaq poligondarynyń aýmaǵynan tys jerlerden zymyran jáne áýe nysanalarynyń synyqtaryn tapqan jaǵdailar bolǵan. Biraq olarda adam shyǵyny men búliný tirkelmegen. Alaida bul málimetter qyzmettik aqparat bolǵandyqtan tolyq usynylmaidy", – delingen resmi jaýapta.
Astana qalalyq sotynyń azamattyq ister jónindegi alqasynyń otyrysy uzaqqa sozylǵan joq. Sýdialar qysqa ǵana keńesip, apelliatsiialyq shaǵymdy qanaǵattandyrýdan bas tartty. Alǵashqy sottyń sheshimi kúshinde qaldyryldy.
