Almaty oblysynyń Shonjy aýylynda bolǵan janjal kezinde 23 jastaǵy jigit oq jaraqatynan kóz jumdy. Qazir is boiynsha eki kúdikti qamaýǵa alynǵan. Marqumnyń týystary tergeýdiń ádil júrgizilýin talap etip otyr, dep habarlaidy dalanews.kz.
Qaiǵyly oqiǵa shamamen eki ai buryn aýyldaǵy dámhanalardyń biriniń mańynda bolǵan.
Aldyn ala málimet boiynsha, bir-birin tanityn azamattar arasynda sózge kelispeýshilik týyndap, keiin janjal tóbeleske ulasqan. Sol kezde kúdiktilerdiń biri atys qarýyn qoldanǵan.
Marqumnyń týystarynyń aitýynsha, Almas Slamjanovtyń oń jaq keýde tusyna bytyra oǵy tigen. Jaralanǵan jigit aýrýhanaǵa jetkizilgenshe kóz jumǵan.
23 jastaǵy Almastyń artynda jubaiy men eki qyzy qaldy. Jaqyndarynyń sózinshe, ol sportpen ainalysyp, qazaq kúresinen sport sheberligine úmitker bolǵan. Sońǵy ýaqytta aýyldaǵy qus fabrikasynda jumys istegen.
Marqumnyń ákesi oqiǵa kezinde balasynyń janjaldy toqtatýǵa tyrysqanyn aitady.
Almaty oblystyq politsiia departamentiniń málimetinshe, qylmys quraly tárkilenip, is materialdaryna tirkelgen. Sondai-aq qarýdyń shyǵý tegi, ony zańsyz satyp alý jáne saqtaý derekteri tekserilip jatyr.
Qazirgi ýaqytta eki adam kúdikpen qamaýda otyr. Qajetti saraptamalar taǵaiyndalyp, sotqa deiingi tergeý jalǵasýda.
Politsiia ókilderi istiń tergeýi vedomstvo basshylyǵynyń baqylaýynda ekenin habarlady.
Derekkóz: KTK telearnasy
