Mámilege qol qoiý jónindegi jumys tolyǵymen aiaqtalǵannan keiin BAQ ókilderine arnalǵan baspasóz jiyny ótedi. Kásiporynnyń jańa investory belgili bolyp, oǵan júktelgen mindetter týraly aqparat beriledi.
Buǵan deiin Úkimetbasy Álihan Smaiylov Arcelor-dyń qazaqstandyq aktivterin aldaǵy úsh jylda kásiporynǵa kemi 3 mlrd dollar investitsiia quiatyn investorǵa beriletinin málim etken. Kásiporynnyń jańa qojaiyny alǵashqy kezeńde zaýyttyń qaýipsizdigin qamtamasyz etýge birden 1,3 mlrd dollar investitsiia quiýy tiis.
Bul soma qaidan shyqty?
2021 jyly el Úkimeti men ArcelorMittal-dyń arasyndaǵy túsinistik týraly memorandýmǵa qol qoiylǵan tusta úndi oligarhy aldaǵy 10 jyl ishinde óndiristi jańǵyrtýǵa 3 milliard dollar investitsiialaýǵa ýáde etken. Kásiporyndy memleket menshigine alý 46 kenshiniń ómirin jalmaǵan Kostenko shahtasyndaǵy tragediiadan keiin qaýyrt júrip, túpkilikti sheshim qabyldandy.
Smaiylovtyń atap ótkenindei Qazaqstan aktivterdi memleket menshigine alý úshin biýdjet qarajatyn paidalanýdy josparlap otyrǵan joq. Premer kommertsiialyq qupiiaǵa siltep, mámileniń basqa málimetterin jariialaýdan bas tartqan.
Belgili bolǵandai, aktivterdi berý protsesi búgin aiaqtalýy tiis: kásiporyn otandyq investorǵa tapsyrylady.
Kostenko shahtasyndaǵy qaiǵyly oqiǵadan keiin AMT-nyń jańa basshysy bolyp 2017-2021 jyldary osy kásiporyndy basqarǵan Vadim Basin taǵaiyndaldy. ArcelorMittal buǵan deiin Qazaqstandaǵy 15 kómir jáne temir rýdasyna, Temirtaýdaǵy metallýrgiialyq zaýyt pen jylý elektr stantsiiasyna jáne Aqtaýdaǵy qubyr zaýytyna qojalyq etti. 2021 jyly bul aktivter bas holding tabysynyń 3,21%-yn qamtamasyz etti (15,565 mlrd dollardyń 500 mln dollary, red).
ArcelorMittal aktsiialarynyń 39%-y úndi milliardery Lakshmi Mittaldyń otbasyna tiesili (Forbes reitinginde 14,9 mlrd $ tabyspen 110-shy orynda tur), 61%-y ashyq naryqta saýdalanady, zaýyttyń 5,83%-y amerikalyq BlackRock kompaniiasyna tiesili.
https://dalanews.kz/sadak/95766-nazarbaev-urpaqsyz-emespin-uldarym-b
