Qarabulaq aýylynda Sairam aýdanynyń ziialy qaýym ókilderimen jáne turǵyndarymen kezdesýde óńir basshysy sairamdyqtardyń usynystary men tilekterin tyńdady. El Prezidenti Qasym-Jomart Toqaevtyń tapsyrmasymen batys jáne ońtústik oblystardy damytý jospary ázirlenetinin, bul bastama el áleýetin kóterýge oń serpin beretinin atap ótti. Sonymen birge tótenshe jaǵdai kezinde birligi men tynyshtyǵyn saqtaǵan Túrkistan jurtshylyǵynyń otanshyldyǵyna rizashylyǵyn bildirip, bunyń bári jergilikti ákimdikter men qoǵam músheleriniń, halyqtyń arasyndaǵy bailanystyń jaqsy dárejede bolǵanynyń belgisi ekendigin jetkizdi.
– Óńir turǵyndarynyń aýyzbirshiligi men tártip saqshylarynyń, ákimdikterdiń, qoǵam belsendileri men ziialy qaýym jáne erikti jastardyń birlese atqarǵan jumysy nátijesinde oblysymyzda buzaqylyq oqiǵalary tirkelgen joq. Beibit mitingter boldy, bárine jedel túsindirý jumysy júrgizilip, dialog ornatyldy. Nátijesinde oblysymyzdan tótenshe jaǵdai rejimi alynyp tastaldy. Kabinette otyra berseń, halyqpen kezdesip turmasań, qoǵamdaǵy keibir máselelerdi bilmei qalýyń múmkin. Sondyqtan pandemiia qoldy bailasa da, aýdan, qalalarǵa saparymda mindetti túrde ardagerlermen, ziialy qaýymmen kezdesemin. Kezdesýge kásipkerlerdi, jastardy, qoǵam belsendilerin, jalpy aitary bar turǵyndardy da qosyp otyrmyz. Sóileseiik, bir-birimizdi tyńdaiyq, eldiń máselesin birlese shesheiik degen oi. Erkin pikir almasyp, suraqtaryńyzǵa jaýap berýge daiynmyn, – degen ákim sairamdyqtardyń igi isterin joǵary baǵalady.
– Turǵyndary tyǵyz ornalasqan Sairamda árkim óz tirligimen ainalysyp jatyr. Qoly bos júrgen adam joq. Óziniń aýylynda, qorasynda, baqshasynda jumys istep júr. Birligin saqtap, tártipsizdikterge qatyspady. Óitkeni jumysy bar. Ekinshiden, Sairam aýdanynda «Parasat» pikirtalas klýby jumys isteidi. Klýbtyń kóshpeli otyrystary ár aýylda ótip, keleli máseleler talqylanady. Birazy sol mezette sheshilip jatady. Eń bastysy, bilik pen halyq arasyndaǵy dialog alańy bar. Sairam aýdanynyń tájiribesin barlyq aýdan, qalada qoldanýymyz kerek.
Kásipkerlikti damytýda da úlgi tutar isteri mol. Joǵaryda aitqanymdai, bizde halyq pen bilik arasynda bailanys jaqsy. Biraq áli de tereńdete túsýimiz kerek. Ár ákim ózi basqaratyn aýmaqtyń problemasyn, jai-kúiin jaqsy biletin bolsa, óz jumysyn dúrys atqarsa, turǵyndarmen ashyq dialog ornata alady. Memleket basshysy Qasym-Jomart Toqaev úkimetke, ákimdikterge eldiń áleýetin kóterýge baǵyttalǵan tapsyrmalar berdi. Qymbatshylyqty toqtatyp, baǵany turaqtandyrý, jumyssyzdyqpen kúres, qoǵammen bailanysty nyǵaitý jáne ózge de salalarda jaqsy beturystar bolady jáne osy baǵytta jumysty kúsheitemiz. Sizderdiń usynystaryńyz ben pikirlerińiz nazarǵa alynady, – dedi Ó.Shókeev.
Kezdesýde ardagerler men ziialy qaýym, jastar, jergilikti turǵyndar qoǵamdaǵy túrli máseleni qaýzap, usynystaryn jetkizdi. Oblystyq Ardagerler keńesiniń tóraǵasy Jeńisbek Máýlenqulov pen el aǵalary da keleli oi qozǵady. Eldiń birliginen asqan qundylyq joq ekenin aityp, Prezidenttiń bastamalaryn qoldaityndaryn aitty.
Oblys ákimi jumys saparynda Sairam aýdandyq «Jastar resýrstyq ortalyǵy» janynan quralǵan Eriktiler mektebi ókilderimen kezdesti. Munda 80-ge jýyq volonter turaqty túrde qaiyrymdylyq is-sharalarymen ainalysady. Jastardyń bastamasyn oń baǵalaǵan ákim olardyń jumysyna sáttilik tiledi.
Jumys saparynda Ómirzaq Shókeev Qasymbek datqa eldi mekenindegi «MEDICAL PARK-E» meditsinalyq ortalyǵynyń jumysymen tanysty. 2020 jyly ashylǵan ortalyqta 6 bilikti dáriger elge meditsnalyq kómek kórsetýde. Sonymen birge óńir basshysy agrarlyq tehnikalyq kolledjdiń sheberhanasyn aralap kórdi. Munda aýyl sharýashylyǵy salasynyń mamandary daiarlanyp, elge qyzmet etip keledi.
