Shymkent qalasyndaǵy №43 mekteptiń bas býhgalteri Aidana Mekemtas biýdjet qarjysyn urlaǵany úshin eki jylǵa bas bostandyǵynan aiyryldy. Bul týraly qalalyq sottyń baspasóz qyzmeti habarlady, dep habarlaidy Dalanews.kz.
Sot dereginshe, 27 jastaǵy Mekemtas 2022 jyldyń qańtarynan 2024 jyldyń tamyzyna deiin mekteptiń elektrondy tsifrlyq qoltańbasyn paidalanyp, 15 muǵalimniń jalaqysyn negizsiz arttyryp otyrǵan. Keiin «tehnikalyq qate oryn aldy» degen syltaýmen artyq tólengen qarajatty óziniń jeke esepshotyna aýdarýdy surap otyrǵan.
Sonymen qatar, ol mektepke taýar satyp alýǵa bólingen aqshany jeke kásipkerdiń esepshotyna aýdaryp, bul qarjyny da óz qajetine jaratqan. Tergeý barysynda memleketke keltirilgen zalal 13 million teńgeden asqany anyqtaldy.
Aidana Mekemtas sotta óz kinásin tolyq moiyndap, jymqyrylǵan qarjyny jeke maqsatta paidalanǵanyn aitqan. Ol memleketke keltirilgen zalaldy tolyǵymen ótegen.
Sot ony Qylmystyq kodekstiń 189-baby 3-bóligi 1 jáne 2-tarmaqtary – "Qyzmet babyn paidalana otyryp, senip tapsyrylǵan múlikti iemdený nemese jymqyrý" boiynsha kináli dep tanydy. Úkimge sáikes, ol eki jylǵa bas bostandyǵynan aiyryldy jáne ómir boiyna memlekettik jáne kvazimemlekettik sektorda qyzmet etý quqyǵynan aiyryldy.
Jábirlenýshi tarap retinde qalalyq bilim basqarmasy tanyldy. Úkim zańdy kúshine endi. Sottalýshy sot zalynda qamaýǵa alynyp, jazasyn qaýipsizdigi eń tómen mekemede óteitin boldy.
